តំបន់ភាគខាងជើងចិន ត្រូវបានគ្របដណ្ដប់ទៅដោយផ្សែងពុលអស់រយៈពេល ៥ថ្ងៃជាប់គ្នាមកហើយ គិតត្រឹមថ្ងៃនេះ ដោយរំខានដល់ជើងហោះហើរ ចរាចរណ៍តាមផ្លូវគោក និងការដឹកជញ្ជូនតាមផ្លូវទឹក និងបានបិទរោងចក្រ និងសាលារៀនផងដែរ ខណៈពលរដ្ឋបានរអ៊ូរទាំថា វិធានការប្រឆាំងផ្សែងពុល មិនដំណើរការ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
បើតាម Reuters ក្រុមអធិការកិច្ចរាប់រយនាក់របស់រដ្ឋាភិបាលចិន បានចេញល្បាតនៅទីក្រុងប៉េកាំងនៅថ្ងៃនេះ ដើម្បីត្រួតពិនិត្យមើលវិធានការផ្អាកការបំភាយផ្សែងបណ្ដោះអាសន្ន។ អគារខ្ពស់ៗជាច្រើននៅក្នុងទីក្រុងប៉េកាំង ហាក់បំបាំងខ្លួនបាត់នៅក្នុងផ្សែងបំពុលនោះ ខណៈប្រជាពលរដ្ឋធ្វើដំណើរទៅធ្វើការទាំងពាក់ម៉ាស់មុខ។
ការផ្អាកដំណើរការជាបណ្ដោះអាសន្ននូវដំណើរការរបស់រោងចក្រថាមពល រោងចក្រផលិតដែកថែប និងកំពង់ផែន ដើម្បីកាត់បន្ថយការបំភាយផ្សែងនោះ ត្រូវបានគេវាយតម្លៃថានឹងដាក់សម្ពាធទៅលើតម្លៃធ្យូងថ្ម ខណៈដែលចិនគឺជាប្រទេសប្រើប្រាស់ធ្យូងថ្មច្រើនជាងគេនៅលើពិភពលោក។
គិតត្រឹមថ្ងៃម្សិលមិញនេះ ទីក្រុងចំនួន ២០ បានប្រកាសអាសន្នអំពីគ្រោះថ្នាក់នៃការបំភាយផ្សែងមានកម្រិតសារធាតុពុលខ្ពស់៕
