តុលាការកូរ៉េខាងត្បូងមួយ នៅថ្ងៃនេះ បានចេញដីកាស្វែងរកចាប់ខ្លួនអ្នកស្រី ជុង យូរ៉ា កូនស្រីអ្នកស្រី ឆយ ស៊ុនស៊ីល មិត្តភក្តិជិតស្និទ្ធរបស់ប្រធានាធិបតី អ្នកស្រី ផាក ហ្គឹនហេ ជុំវិញរឿងអាស្រូវប្រើប្រាស់ឥទ្ធិពលអ្នកធំ ដែលនាំឲ្យសភាបោះឆ្នោតដកសេចក្ដីទុកចិត្តពីអ្នកស្រី ផាក កាលពីប៉ុន្មានសប្ដាហ៍កន្លងមកថ្មីៗនេះ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
Reuters បានចុះផ្សាយដូច្នេះ ដោយបានដកស្រង់សម្ដីអ្នកនាំពាក្យការិយាល័យរដ្ឋអាជ្ញាពិសេសរបស់តុលាការកូរ៉េខាងត្បូង លោក លី ឃ្យូជុល ដែលបានថ្លែងនៅក្នុងសន្និសីទសារព័ត៌មាននៅព្រឹកថ្ងៃនេះថា រដ្ឋអាជ្ញាកូរ៉េខាងត្បូង នឹងស្នើសុំកិច្ចសហប្រតិបត្តិការជាមួយរដ្ឋអាជ្ញាអាល្លឺម៉ង់ ដើម្បីចាប់ខ្លួនអ្នកស្រី ជុង ដែលត្រូវបានគេជឿថា កំពុងរស់នៅក្នុងប្រទេសអាល្លឺម៉ង់។
បើតាមអ្វីដែលលោក លី ថ្លែងប្រាប់អ្នកសារព័ត៌មាននោះ អ្នកស្រី ជុង កំពុងប្រឈមមុខនឹងការចោទប្រកាន់ជាច្រើន ក្នុងនោះមានទាំង ការរារាំងដំណើរការតុលាការផងដែរ។ ចំណែកមេធាវីតំណាងឲ្យអ្នកស្រី ជុង Reuters ផ្សាយថា ខ្លួនមិនទាន់ទាក់ទងសុំការបកស្រាយបានភ្លាមៗទេ៕
