ក្រសួងកសិកម្មបានឲ្យដឹងថា ការនាំចេញអង្កររបស់កម្ពុជាក្នុងឆ្នាំ២០១៦នេះមានការកើនឡើង តែក្រសួងនៅតែមានការបារម្ភពីការទម្លាក់តម្លៃស្រូវនៅតាមមូលដ្ឋានរបស់ឈ្មូញទិញអង្គរ។
របាយការណ៍របស់ក្រសួងកសិកម្មពីសកម្មភាពការងាររបស់ខ្លួនសម្រាប់រយៈពេល១១ខែ ឆ្នាំ២០១៦ បានឲ្យដឹងថាការប្រមូលផលស្រូវវស្សាបាន៣ ៥៤៦ ១១៩តោនលើសឆ្នាំមុនជាង១លានតោន ហើយការនាំចេញអង្ករកម្ពុជាក្នុងរយៈពេល១១ខែនេះ មានបរិមាណចំនួន ៤៧៩ ៦៨៩តោន ដែលកើនឡើងលើសឆ្នាំមុន ២២ ៧៧២តោន ។
តាមរបាយការណ៍ដដែល អង្ករកម្ពុជាបាននាំចេញទៅកាន់៦៤ប្រទេស ក្នុងនោះចិនឈរលំដាប់ទីមួយ បារាំងឈរលេខពីរ ប៉ូឡូញឈរលេខបី និងប្រទេសម៉ាឡេស៊ីឈរលំដាប់លេខបួន ដែលបាននាំចេញដោយក្រុមហ៊ុនចំនួន៨៣។
ក្រសួងកសិកម្មបានឲ្យដឹងថា មកទល់នឹងពេលនេះការងារបង្កបង្កើនផលស្រូវរដូវវស្សាឆ្នាំ២០១៦ បានបញ្ចប់ជាស្ថាពរហើយ ហើយប្រជាកសិករកំពុងប្រមូលផលស្រូវរដូវវស្សានេះយ៉ាងសកម្មផងដែរ តែខណៈដែលមានការប្រមូលស្រូវស្រាល ដើមឆ្នាំនេះក៏មានការបន្ទាបតម្លៃស្រូវនៅលើទីផ្សារ ដែលធ្វើឲ្យប៉ះពាល់ទៅលើចំណូលរបស់កសិករផងដែរ៕