មន្ត្រីគណបក្សសង្គ្រោះជាតិ ក្រុងប៉ោយប៉ែត ខេត្តបន្ទាយមានជ័យ ត្រូវសត្ថមកិច្ចចាប់ឃុំខ្លួននឹងគ្រោងបញ្ជូនទៅតុលាការនៅរសៀលថ្ងៃសុក្រនេះ បន្ទាប់ពីមានបញ្ហាជាមួយមន្រ្តីនគរបាលច្រកព្រំដែន។
ការចាប់ឃុំខ្លួននេះ បន្ទាប់ពីនគរបាលម្នាក់បានចោទថា អនុប្រធានគណបក្សសង្គ្រោះជាតិប្រចាំខេត្តបន្ទាយមានជ័យ លោក ម៉ង់ ពុទ្ធី បានបើកឡានបុកនគរបាលរូបនោះឲ្យសន្លប់ ដោយចោទប្រកាន់ពីបទប៉ុនប៉ងមនុស្សឃាតដោយចេតនា។
ប៉ុន្តែចៅសង្កាត់ប៉ោយប៉ែត លោក ចៅ វាសនា ប្រាប់វីអូឌីនៅថ្ងៃសុក្រនេះថា លោក ម៉ង់ ពុទ្ធី មិនបានជិះឡានបុកប៉ូលីសម្នាក់នោះដូចការចោទប្រកាន់ឡើយ។ លោកថាជម្លោះនេះកើតឡើងដោយសារអាជ្ញាធរនៅទីនោះ មានគំនុំជាមួយលោក ម៉ង់ ពុទ្ធី ខណៈដែលលោកធ្លាប់ជួយដោះស្រាយបញ្ហាឲ្យពលរដ្ឋដែលត្រូវបានអាជ្ញាធរចាប់យកម៉ូតូ នៅពេលប្រជាពលរដ្ឋមិនបានបង់លុយឲ្យមន្ត្រីប៉ូលីសរូបនោះ។
លោក ស៊ុំ ចាន់គា មន្រ្តីសិទ្ធិមនុស្សអាដហុកខេត្តបន្ទាយមានជ័យបានឲ្យដឹងថា មកទល់ពេលនេះហើយមិនទាន់មានសាក្សីចង្អុលបង្ហាញថា ឡានបុកប៉ូលិសអន្តោបវេសន៍សោះ កម្មករ អ្នកអូសរទេះ អ្នករត់ម៉ូតូឌុប បានលើកឡើងថាសមត្ថកិច្ចដួលខាងមុខឡានដោយខ្លួនឯង ចំណែករូបភាពតាមរយៈសមត្ថកិច្ចបង្ហោះចេញមន្ទីរពេទ្យប្រទេសថៃ បានបង្ហាញអំពីការរបូសយ៉ាងធ្ងន់ធ្ងរ ឃើញរុំគ្រាសត្រង់កនិងស្នាមនៅលើភ្លៅ ជាលក្ខណៈប៉ះទង្គិច ។
បើតាមវីដេអូដែលផ្សាយតាមហ្វេសប៊ុកបង្ហាញថា ប៉ូលីសម្នាក់ឈ្មោះ ពិសិដ្ឋ បានផ្តួលខ្លួនឯងនៅមុខរថយន្តមួយគ្រឿង ដោយក្នុងដៃមានកាន់អាយកូមមិនព្រមព្រលែងចោលឡើយ ខណៈខ្លួនបានឃាត់រថយន្តមួយគ្រឿង៕
