តុលាការកំពូលសម្រេចលើកពេលប្រកាសសាលដីកាយុវជន គង់ រ៉ៃយ៉ា ទៅចុងខែធ្នូនេះ បន្ទាប់ពីបានស្តាប់សវនាការនៅព្រឹកនេះ ពាក់ព័ន្ធសំណុំរឿងញុះញង់បង្កបទឧក្រិដ្ឋជាអាថ៌ ដោយសារការបង្ហោះសារលើហ្វេសប៊ុកពីបដិវត្តន៍ពណ៌។
កាលពីថ្ងៃទី១៥ មីនា ឆ្នាំ២០១៦ តុលាការរាជធានីភ្នំពេញបានកាត់ទោសយុវជន ឈ្មោះ គង់ រ៉ៃយ៉ា ដែលរងការចោទប្រកាន់ពីបទញុះញង់ឲ្យមានបដិវត្តន៍ពណ៌ប្រឆាំងរដ្ឋាភិបាល ឲ្យជាប់ពន្ធនាគារ១ឆ្នាំ៦ខែ ក្រោយពីរងការចោទប្រកាន់ទាំងនេះលោកបានដាក់ពាក្យបណ្តឹងសារទុក្ខជាបន្តបន្ទាប់ទៅតុលាការជាន់ខ្ពស់។
បន្ទាប់ពីបើកសវនាការនៅព្រឹកនេះ តុលាការកំពូលបានសម្រេចលើកពេលប្រកាសសាលដីកាលើសំណុំរឿងលោក គង់ រ៉ៃយ៉ា ទៅថ្ងៃទី២៩ ធ្នូ ចុងខែនេះ។
ក្នុងសាលសវនាការរបស់តុលាការកំពូលនៅព្រឹកនេះយុវជន គង់ រ៉ៃយ៉ា បានទទួលស្គាល់ថា ខ្លួនបានសរសេរដូចអ្វីដែលបានចោទប្រកាន់មែន តែលោកថាលោកមិនសុខចិត្តទៅនឹងសេចក្តីសម្រេចរបស់សាលាដំបូងដែលបានផ្តន្ទាទោសលោក ដោយគ្រាន់តែការបង្ហោះសារនៅលើហ្វេសប៊ុកតាមតែមានកំហឹងមួយឆាវ ហើយថាគ្មានឥទ្ធិពលអ្វីទៅលើសង្គមដែលនាំឲ្យមានការប្រមូលផ្តុំធ្វើការប្រឆាំងរដ្ឋាភិបាលនោះទេ។
មេធាវីការពារក្តីឲ្យលោក គង់ រ៉ៃយ៉ា បានថ្លែងក្នុងសវនាការថា អ្វីដែលកូនក្តីលោកបានសរសេរនៅក្នុងហ្វេសប៊ុកនោះ គឺគ្រាន់តែជាការបញ្ចេញមតិដែលបានការពារដោយរដ្ឋធម្មនុញ្ញ។ លោកថាភស្ភុតាងដែលបានដាក់បន្ទុកលើកូនក្តីខ្លួន គឺមានការវិមតិសង្ស័យច្រើននិងការយល់ពីអត្ថន័យនៃបដិវត្តន៍ពណ៌រវាង គង់ រ៉ៃយ៉ា និងរដ្ឋាភិបាលគឺខុសគ្នា។
នៅពេលចេញពីបន្ទប់សវនាការដោយដៃជាប់ខ្នោះយុវជន គង់ រ៉ៃយ៉ា ស្រែកថាលោកមិនមានជំនឿថាតុលាការកម្ពុជានឹងសម្រេចឲ្យលោករួចទោសនោះទេ។
លោកថា៖ «អ្នកដែលមានមតិដែលប្រឆាំងនឹងរដ្ឋាភិបាល គឺសូម្បីតែមួយថ្ងៃ មួយម៉ោង មួយនាទី ក៏គេមិនទុកឲ្យបានសុខដែរ»។
ទាំងមេធាវីនិងកូនក្តី បានស្នើសុំដល់តុលាការកំពូលពិចារណាដោះលែងលោក គង់ រ៉ៃយ៉ា ក៏ព្រោះតែក្នុងការអនុវត្តទោសនេះធ្វើឲ្យ គង់ រ៉ៃយ៉ា ខាតពេលសិក្សានិងមិនអាចជួយការងារសង្គម។
យុវជន គង់ រ៉ៃយ៉ា ជានិស្សិតនៃសាកលវិទ្យាល័យខេមរៈ ត្រូវចាប់ខ្លួនកាលពីថ្ងៃទី២១ ខែសីហា ឆ្នាំ២០១៥ ពាក់ព័ន្ធការចោទថាញុះញង់ឲ្យមានបដិវត្តន៍ពណ៌តាមរយៈបណ្តាញសង្គមហ្វេសប៊ុក។ លោកត្រូវបានបានសាលាដំបូងរាជធានីភ្នំពេញសម្រេចដាក់ពន្ធនាគារ១ឆ្នាំ៦ខែ ពីបទញុះញង់ឲ្យមានបដិវត្តន៍ពណ៌ប្រឆាំងរដ្ឋាភិបាល។ រហូតមកដល់ពេលនេះលោកត្រូវបានអនុវត្តន៍ទោសបាន១ឆ្នាំ៤ខែហើយ៕
