នៅឯប្រទេសហ្វីលីពីន អាជ្ញាធរបានប្រកាសប្រាប់ប្រជាជនរាប់ម៉ឺននាក់ ឲ្យចាកចេញពីផ្ទះសម្បែងរបស់ពួកគេនៅថ្ងៃនេះ ខណៈដែលព្យុះទីហ្វុងដ៏ខ្លាំងក្លាមួយ កំពុងតែគំរាមកំហែងឆ្នេរភាគខាងកើតប្រទេសនេះ នៅចំថ្ងៃបុណ្យណូអែល។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ព្យុះទីហ្វុងណុងថេន (Nock-Ten) ត្រូវបានគេព្យាករថានឹងបក់បោកក្នុងល្បឿន ២២២គីឡូម៉ែត្រក្នុងមួយម៉ោង នៅពេលវាចូលទៅដល់កោះកាតាដួន ជាកោះដាច់ស្រយាលមួយដែលមានប្រជាជន ២៥ម៉ឺននាក់។
ព្យុះនេះត្រូវបានគេព្យាករថា នឹងបោកបក់ទៅដល់កោះលូហ្សូន និងទីក្រុងម៉ានីល នៅថ្ងៃចន្ទសប្ដាហ៍ក្រោយនេះ។ តំបន់កសិកម្ម Bicol ដែលមានប្រជាជន ៥លាន ៥សែននាក់ គឺជាតំបន់ដែលរងខ្យល់ព្យុះចំនួន ២០លើកមុនគេ ដែលតែងតែបក់បោកលើប្រទេសជុំវិញទៅដោយជួរភ្នំមួយនេះ នៅរៀងរាល់ឆ្នាំ។
ព្យុះមានកម្លាំងបក់បោកខ្លាំងបំផុត និងកំណាចបំផុត គឺព្យុះហៃយ៉ាន ដែលបានសម្លាប់មនុស្ស ៧៣៥០នាក់ ហើយបានបំផ្លិចបំផ្លាញទីប្រជុំជននានាទាំងស្រុង នៅតំបន់ភាគកណ្ដាលនៃប្រទេសហ្វីលីពីន កាលពីឆ្នាំ២០១៣កន្លងមក៕