នៅឯប្រទេសហ្វីលីពីន អាជ្ញាធរនិយាយថា ការបំផ្ទុះមួយ បានកើតឡើងនៅក្នុងរថយន្តប៉ូលិសមួយនៅខាងក្រៅវិហារកាតូលិក នៅភាគខាងត្បូងប្រទេសនេះ កាលពីល្ងាចម្សិលមិញនេះ បណ្ដាលឲ្យរបួសមនុស្ស ១៣នាក់ ក្នុងនោះមានទាំងមន្ត្រីប៉ូលិសម្នាក់ផងដែរ។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
AFP បន្តថា ការបំផ្ទុះនោះ បានប៉ះពាល់ទៅដល់អ្នកធ្វើដំណើរទៅចូលក្នុងវិហារ នៅចំថ្ងៃបុណ្យណូអែល នៅឯទីប្រជុំជន Midsayap។
បុព្វជិត Jay Virador បានប្រាប់អ្នកយកព័ត៌មានថា ការបំផ្ទុះនោះបានកើតឡើងប្រហែល ៣០ម៉ែត្រពីច្រកចូលព្រះវិហារ និងបង្កភាពតក់ស្លុតដល់អ្នកនៅទីនោះ។
ប៉ូលិសតំបន់ បានបញ្ជាក់ថា ការបំផ្ទុះនោះកើតចេញពីឧបករណ៍រំសេវផ្ទុះដែលគេមិនអាចកំណត់បានឲ្យជាក់លាក់នោះឡើយ។
មនុស្ស ១៣នាក់ បានរងរបួសដោយសារបំផ្ទុះនោះ ហើយត្រូវបាននាំយកទៅព្យាបាលនៅមន្ទីរពេទ្យជិតៗនោះ ក្នុងនោះមានទាំងមន្ត្រីប៉ូលិសម្នាក់ផងដែរ៕
