មន្ត្រីនគរបាលខណ្ឌដង្កោ បានឲ្យដឹងថា ជនសង្ស័យដែលត្រូវចាប់ខ្លួនបានអំឡុងពេលសមត្ថកិច្ចបង្ក្រាបទីតាំងផលិតឯកសារពន្ធក្លែងក្លាយកាលពីថ្ងៃម្សិលមិញនេះ កំពុងស្ថិតនៅក្រោមការសាកសួររបស់មន្ត្រីនគរបាលខណ្ឌ។
អធិការនគរបាលខណ្ឌដង្កោ លោក ជឹម ស៊ីថា បានប្រាប់វីអូឌីនៅព្រឹកថ្ងៃនេះថា សមត្ថកិច្ចបានរកឃើញសម្ភារៈ ១៦មុខ និងចាប់ខ្លួនជនសង្ស័យម្នាក់ នៅអំឡុងពេលឆែកឆេរ កាលពីថ្ងៃម្សិលមិញនេះ។
លោកបន្ថែមថា ជនសង្ស័យឈ្មោះ ហួត ចិន អាយុ២១ឆ្នាំ ដែលត្រូវសមត្ថកិច្ចចាប់ខ្លួនកាលពីថ្ងៃម្សិលមិញនោះ កំពុងស្ថិតក្រោមការសាកសួររបស់មន្ត្រីនគរបាលខណ្ឌរបស់លោកនៅឡើយ។
មន្ត្រីនគរបាលរូបនេះ បន្តថា បើតាមការសាកសួរនេះ ជនសង្ស័យបានបន្លំឯកសារទាំងនោះជាង ៧ខែរួចមកហើយ និងមានបក្សពួកជាច្រើននាក់ទៀតចូលរួមរកស៊ីបន្លំឯកសារនោះ ប៉ុន្តែ លោកថា ជនសង្ស័យខាងលើនេះ គ្រាន់តែជាអ្នកយកឯកសារទាំងនោះទៅឱ្យអតិថិជនប៉ុណ្ណោះ។
លោកបញ្ជាក់ថា ជនសង្ស័យអាចជាប់ចោទពីបទក្លែងឯកសារសាធារណៈ និងប្រើប្រាស់ឯកសារក្លែងក្លាយ។
ប្រធានការិយាល័យពន្ធគយខណ្ឌដង្កោ លោក ធៀម ថា បានឱ្យដឹងថា លោកមិនទាន់អាចសរុបសម្ភារៈផលិតឯកសារពន្ធក្លែងក្លាយដែលសមត្ថកិច្ចរឹបអូសបានកាលថ្ងៃម្សិលម៉ិញបាននៅឡើយទេ។
លោកថា “អត់ទាន់ដឹងទេ គ្រាន់តែថា របស់តែវាផលិតក្លែងក្លាយចឹង វាចេះតែថា លក់តម្លៃនេះ តម្លៃនោះស្រេចតែលើមាត់ ដូចលើពន្ធផ្លូវយើង ៨០ម៉ឺន ១លាន ២លានអី វាយកមកលក់ ៥០ដុល្លា ២០ដុល្លា ១០ដុល្លាអីចឹង អានឹងក្លែងឯកសារសាធារណៈ បទល្មើសព្រហ្មទណ្ឌ បទល្មើសជាប់ពី ៥ ទៅ ១០ឆ្នាំ ដែលគេហៅថា បទល្មើសបំផ្លាញប្រយោជន៍ជាតិ”។
លោកបញ្ជាក់ថា ក្រុមក្លែងបន្លំឯកសារទាំងនោះមានច្រើននាក់ ប៉ុន្តែ បានរត់គេចខ្លួនអស់ នៅមុនសមត្ថកិច្ចចុះទៅដល់៕