នៅថ្ងៃនេះ នាយករដ្ឋមន្ត្រីជប៉ុន លោក ស៊ិនហ្ស៊ូ អាបេ បានធ្វើដំណើរទៅដាក់កម្រងផ្កានៅតាមស្តូបអនុស្សាវរីយ៍ជាច្រើនកន្លែងនៅកោះហាវៃ ពោលគឺមួយថ្ងៃមុននឹងលោកទៅទស្សនាទីតាំងនៃការទម្លាក់គ្រាប់បែកនៅកំពង់ផែ Pearl នៅឆ្នាំ១៩៤១ អំឡុងដំណើរមួយក្នុងបំណងបង្ហាញសម្ព័ន្ធភាពដ៏រឹងមាំរវាងប្រទេសជប៉ុន និងសហរដ្ឋអាមេរិក។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
លោក អាបេរ មិនបានថ្លែងសារអ្វីនោះឡើយ ហើយបានឈរដោយស្ងៀមស្ងាត់នៅមុខកម្រងផ្កា នៅឯទីស្មសានជាតិប៉ាស៊ីហ្វិក ជាទីដែលបញ្ចុះមនុស្សទាំងឡាយណាដែលបានស្លាប់អំឡុងបម្រើការងារក្នុងកងទ័ពអាមេរិក។
លោក អាបេ រួមជាមួយសមាជិកគណៈរដ្ឋមន្ត្រីពីររូបរបស់លោក បានឱនក្បាលគោរពនៅចំពោះមុខកម្រងផ្កា និងបានលុតជង្គង់នៅមុខផ្ទាំងសិលាម៉ាលីគី នៅទីក្រុងហូណូលូលូ ដើម្បីឧទ្ទិសដល់ពលរដ្ឋជប៉ុនដែលបានរស់នៅលើកោះហាវៃ នៅក្នុងសតវត្សរ៍ទី ១៩។
ទោះជាយ៉ាងណា លោក អាបេ មិនមានគម្រោងថ្លែងសុំទោសចំពោះការទម្លាក់គ្រាប់ដោយកងទ័ពជប៉ុននៅឆ្នាំ១៩៤១នោះឡើយ ប៉ុន្តែ លោកនឹងថ្លែងសារសម្ដែងការលួងលោមព្រលឹងអ្នកស្លាប់នៅក្នុងសង្គ្រាម៕
