តម្រួតថៃនៅថ្ងៃនេះ បានលុបចោលផែនការចាប់ព្រះកាយព្រះសង្ឃមួយអង្គ ដែលត្រូវបានគេសង្ស័យថាបានលាងលុយ បន្ទាប់ពីពុទ្ធសាសនិក បានដាក់បារ៉ាស់បាំងច្រកចូលទៅក្នុងព្រះវិហារនោះ ដែលស្ថិតនៅជាយរាជធានីបាងកក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
វត្តព្រះធម្មកាយ បានទទួលការគាំទ្រយ៉ាងធំ ជាពិសេសពីសំណាក់ក្រុមអ្នកនយោបាយធំៗ និងក្រុមពាណិជ្ជករថៃ ប៉ុន្តែ ក្រុមអ្នករិះគន់និយាយថា វត្តនោះបានកេងប្រវ័ញ្ចពុទ្ធសាសនិករបស់ខ្លួន និងប្រើប្រាស់សាសនាដើម្បីរកលុយកាក់។
អគ្គរាជអាជ្ញាថៃ បាននិយាយកាលពីខែវិច្ឆិកាកន្លងមកថា ខ្លួននឹងចោទប្រកាន់ព្រះចៅអធិការវត្តនេះព្រះនាម ព្រះធម្មជយោ និងមនុស្ស ៤នាក់ទៀត ពីបទសមគំនិតលាងលុយ និងទទួលផលចោរកម្ម។
ជំនួយការព្រះសង្ឃ ធម្មជយោ បានបដិសេធការចោទប្រកាន់នេះ ដោយអះអាងថា ការចោទប្រកាន់នេះមានចរឹកនយោបាយ។
តម្រួតថៃបានព្យាយាមជាច្រើនលើកកាលពីពីរបីខែមុន ដើម្បីសួរចម្លើយព្រះចៅអធិការវត្តអង្គនេះ និងបានព្យាយាមចូលទៅក្នុងវត្ត ប៉ុន្តែ មិនបានសម្រេចជោគជ័យនោះឡើយ។
អ្នកយកព័ត៌មានរបស់ទីភ្នាក់ងារព័ត៌មាន Reuters បានរាយការណ៍ថា នៅថ្ងៃនេះ ខ្លួនបានឃើញព្រះសង្ឃ និងពុទ្ធសាសនិករាប់រយនាក់ នៅក្នុងវត្តនោះ ដែលស្ថិតនៅជិតព្រលានយន្តហោះដនមឿង។ មនុស្សមួយចំនួន បានដាក់បារ៉ាស់បិទច្រកចូល ខណៈអ្នកដទៃទៀតបានពាក់ម៉ាស់មុខ និងសូត្រធម៌។
តម្រួតបានដកហូតបារ៉ាស់ដែកខ្លះនៅខាងក្រៅវត្តនោះ ប៉ុន្តែ មកដល់រសៀលថ្ងៃនេះ ពួកគេបានដកថយចេញពីទីតាំងនោះហើយ៕
