ធនាគារកណ្ដាលកម្ពុជា បានប្រកាសថា វិស័យធនាគារនៅក្នុងប្រទេសកម្ពុជា នៅតែមានជំហររឹងមាំ ដែលធនាគារនេះថា បានចូលរួមចំណែកគាំទ្រកំណើនសេដ្ឋកិច្ចប្រទេសកម្ពុជា។
ក្នុងរបាយការណ៍ស្ដីពីវឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០១៦ និងទស្សនវិស័យឆ្នាំ២០១៧ ធនាគារជាតិកម្ពុជា បាននិយាយថា ទ្រព្យសកម្មក្នុងវិស័យធនាគារ បានកើនឡើងដល់ទៅ ២៧.៨ពាន់លានដុល្លារ នៅក្នុងឆ្នាំ២០១៦នេះ ដោយមានកំណើនដល់ទៅ ១៧.៤ភាគរយ បើធៀបទៅនឹងឆ្នាំ២០១៥កន្លងមក។
ស្ថាប័នគ្រប់គ្រងវិស័យធនាគារនេះ បានឲ្យដឹងបន្ថែមថា ទំហំកម្ចីឥណទានក្នុងវិស័យធនាគារនៅក្នុងប្រទេសកម្ពុជា បានកើនឡើងដល់ទៅ ១៧.៦ពាន់លានដុល្លារ ជាមួយអត្រាកំណើន ១៨.៣ភាគរយ ខណៈដែលទំហំប្រាក់បញ្ញើក្នុងធនាគារ កើនឡើងដល់ទៅ ១៥.៤ពាន់លានដុល្លារ ឬមានកំណើន ២០.៧ភាគរយ បើធៀបនឹងឆ្នាំ២០១៥កន្លងមក។
ជាមួយកំណើនបែបនេះ ធនាគារជាតិកម្ពុជា បានសន្និដ្ឋានថា ស្ថានភាពវិស័យធនាគារ នៅតែបន្តរឹងមាំដដែល៕
