តុលាការកូរ៉េខាងត្បូង បាននិយាយនៅថ្ងៃនេះថា ខ្លួនបានពិន័យក្រុមហ៊ុនផលិតបន្ទះឈីបរបស់អាមេរិក Qualcomm Inc. នូវទឹកប្រាក់ ៨៥៤លានដុល្លារ ដោយតុលាការនិយាយថា ការផ្ដល់ប៉ាតង់របស់ក្រុមហ៊ុននេះសម្រាប់ទូរស័ព្ទស្មាតហ្វូន និងឈីបម៉ូឌែម បានធ្វើឲ្យប៉ះពាល់ដល់ការប្រកួតប្រជែង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
គណៈកម្មការពាណិជ្ជកម្មកូរ៉េខាងត្បូង បាននិយាយថា ក្រុមហ៊ុន Qualcomm បានរំលោភលើការប្រកួតប្រជែងនៅលើទីផ្សារ និងបានបង្ខំឲ្យក្រុមហ៊ុនផលិតទូរស័ព្ទ រក្សាភាពស្មោះត្រង់ចំពោះការប្រើប្រាស់ប៉ាតង់មិនចាំបាច់មួយចំនួន ដែលជាផ្នែកមួយនៃការព្យាយាមលក់បន្ទះឈីបមូឌែមរបស់ខ្លួន។
ស្ថាប័នកាត់ក្ដីវិវាទពាណិជ្ជកម្មមួយនេះ បានបន្ថែមថា ក្រុមហ៊ុនអាមេរិកមួយនេះ ក៏បានធ្វើឲ្យប៉ះពាល់ដល់ការប្រកួតប្រជែងផងដែរ តាមរយៈការបដិសេធ ឬការដាក់កម្រិតទៅលើគូប្រជែងរបស់ខ្លួន ចំពោះការប្រើប្រាស់ប៉ាតង់របស់ខ្លួនសម្រាប់បន្ទះឈីបនៅលើម៉ូឌែម។
ក្រុមហ៊ុន Qualcomm កាលពីខែកុម្ភៈឆ្នាំមុន បានយល់ព្រមបង់ពិន័យនូវទឹកប្រាក់ ៩៧៥លានដុល្លារ នៅក្នុងប្រទេសចិន ក្រោយពីមានការស៊ើបអង្កេតទៅលើករណីបែបនេះផងដែរ។ ក្រៅពីនេះ ក្រុមហ៊ុននេះក៏រងការពិន័យនៅឯសហភាពអឺរ៉ុបផងដែរ ខណៈបញ្ញត្តិករនៅអាមេរិក និងតៃវ៉ាន់ ក៏កំពុងស៊ើបអង្កេតលើក្រុមហ៊ុននេះផងដែរ៕
