អគ្គលេខាធិការអង្គការសហប្រជាជាតិ លោក បាន គីមូន បានរៀបចំពិធីចាកចេញពីអង្គការសហប្រជាជាតិនៅថ្ងៃនេះ ដោយចាត់ទុកការកាន់តំណែង ២អាណត្តិរបស់លោកនៅស្ថាប័នពិភពលោកមួយនេះ ជារឿងនិទាន។
អំឡុងពិធីជប់លៀងជូនលោកនោះ លោក បាន គីមូន បានថ្លែងបែបកំប្លែងទៅកាន់បុគ្គលិក និងសហការីថា លោកមានអារម្មណ៍ថា ដូចស៊ិនដេរ៉េឡា។ លោកបន្តថា ចាប់ពីថ្ងៃស្អែកទៅ គ្រប់យ៉ាងនឹងផ្លាស់ប្ដូរហើយ។
ចាប់ពីថ្ងៃស្អែកទៅ អតីតនាយករដ្ឋមន្ត្រីព័រទុយកាល់ លោក អង់តូនីញ៉ូ ហ្គុយទ័ររ៉េស អាយុ ៦៧ឆ្នាំ នឹងឡើងកាន់តំណែងបន្តពីលោក បាន គីមូន។
លោក ហ្គុយទ័ររ៉េស គឺជាអតីតប្រមុខរដ្ឋាភិបាលដំបូងគេ ដែលបានឡើងទៅដឹកនាំអង្គការសហប្រជាជាតិ ស្នងតំណែងបន្តពីលោក បាន គីមូន សម្រាប់អាណត្តិរយៈពេល ៥ឆ្នាំ៕
