រដ្ឋាភិបាលចិន បានប្រកាសកាលពីថ្ងៃម្សិលមិញថា ប្រទេសនេះនឹងបិទការជួញដូរភ្លុកដំរីនៅក្នុងស្រុកទាំងស្រុងនៅក្នុងរយៈពេល ១ឆ្នាំ ដែលការសម្រេចនេះ នឹងបិទទ្វារសម្រាប់ការនាំចូលភ្លុកដំរីចូលទៅក្នុងប្រទេសមួយនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ក្រុមប្រឹក្សារដ្ឋចិន បាននិយាយក្នុងសេចក្ដីជូនដំណឹងមួយថា ការហាមឃាត់ទាំងស្រុងនេះ នឹងចាប់អនុវត្តចាប់ពីថ្ងៃទី៣១ ខែធ្នូ ឆ្នាំ២០១៧ខាងមុខ។ រោងចក្រ និងហាងនានា នឹងត្រូវបិទទ្វាររបស់ខ្លួន ហើយប្រគល់អាជ្ញាប័ណ្ណរបស់ពួកគេ នៅត្រឹមថ្ងៃទី៣១ ខែមីនា ឆ្នាំ២០១៧។
បើតាម Reuters ក្រុមអភិរក្សសត្វព្រៃ បានសាទរចំពោះការហាមឃាត់នេះ ដោយចាត់ទុកជាការអភិរក្សធំបំផុតនៅឆ្នាំថ្មី។ ក្រុមបរិស្ថាន និយាយថា ភ្លុកសត្វអាចចាត់ទុកថាស្របច្បាប់ ដរាបណាការជួញដូរ ត្រូវបានគេផ្ដល់អាជ្ញាប័ណ្ណលក់នៅតាមដងផ្លូវ និងលើអ៊ីនធឺណិត៕
