ប៉ូលិស និងរដ្ឋអាជ្ញាកូរ៉េខាងត្បូង បានឲ្យដឹងនៅថ្ងៃនេះថា ប៉ូលិសដាណឺម៉ាក បានចាប់ខ្លួនកូនស្រីអ្នកស្រី ឆយ ស៊ុនស៊ីល មិត្តភក្តិរបស់ប្រធានាធិបតីកូរ៉េខាងត្បូង អ្នកស្រី ផាក ហ្គឹនហេ ដែលកំពុងរួបរឹតទៅដោយរឿងអាស្រូវប្រើប្រាស់ឥទ្ធិពល។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើតាម Reuters អាជ្ញាធរកូរ៉ខាងត្បូង កំពុងតែស្វែងរកចាប់ខ្លួនកូនស្រីរបស់អ្នកស្រី ឆយ ឈ្មោះ ជុង យ៉ូរ៉ា ដោយសង្ស័យមានជាប់ពាក់ព័ន្ធនឹងរឿងអាស្រូវនេះ ដែលបានប៉ះពាល់ដល់រដ្ឋាភិបាលរបស់អ្នកស្រី ផាក និងបានជំរុញឲ្យបាតុកររាប់រយពាន់នាក់ ចុះផ្លូវធ្វើបាតុកម្មនៅទីក្រុងសេអ៊ូលអស់រយៈពេលប៉ុន្មានសប្ដាហ៍មកហើយ។
អ្នកស្រី ផាក អាយុ ៦៤ឆ្នាំ អាចក្លាយទៅជាប្រធានាធិបតីជាប់ឆ្នោតដំបូងគេរបស់កូរ៉េខាងត្បូង ដែលនឹងត្រូវបង្ខំឲ្យចុះចេញពីតំណែងនៅមុនពេលផុតអាណត្តិ បន្ទាប់ពីសភាបោះឆ្នោតដកហូតអំណាចកាលពីថ្ងៃទី៩ ខែធ្នូកន្លងមក។ សេចក្ដីសម្រេចនេះ ត្រូវតែទទួលបានបញ្ជាក់ ឬការសម្រេចពីតុលាការធម្មនុញ្ញ។
ប៉ូលិសកូរ៉េខាងត្បូង បាននិយាយថា អ្នកនាង ជុង ដែលជាអ្នកជិះសេះហ្វឹកហាត់នៅអាល្លឺម៉ង់នោះ ត្រូវបានចាប់ខ្លួនដោយសារស្នាក់នៅខុសច្បាប់នៅក្នុងទីក្រុងមួយរបស់ប្រទេសដាណឺម៉ាក។ ដំណឹងនៃការចាប់ខ្លួននេះ ត្រូវបានរាយការណ៍ដំបូងដោយទូរទស្សន៍កូរ៉េខាងត្បូង JTBC។
ប្រឿពពីការិយាល័យរដ្ឋអាជ្ញាពិសេសក្នុងទីក្រុងសេអ៊ូល ដែលបដិសេធបញ្ចេញឈ្មោះ បាននិយាយថា ពួកគេនឹងធ្វើការជាមួយអាជ្ញាធរអឺរ៉ុប ដើម្បីនាំយកអ្នកនាង ជុង ដែលពួកគេគិតថា នឹងសម្រេចឡើងនៅក្នុងរយៈពេល ១ ឬ ២សប្ដាហ៍៕
