រហូតមកដល់ថ្ងៃនេះ អាជ្ញាធរតួកគីកំពុងធ្វើប្រតិបត្តិការស្វែងរកចាប់ខ្លួនខ្មាន់កាំភ្លើងម្នាក់ ដែលបានបាញ់រះសម្លាប់មនុស្ស ៣៩នាក់ ក្នុងនោះមានទាំងជនបរទេសជាច្រើននាក់ផងដែរ នៅក្នុងក្លឹបកម្សាន្តមួយ នៅទីក្រុងអ៊ីស្តង់ប៊ុល នៅចំថ្ងៃឆ្លងឆ្នាំ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
បន្ទាប់ពីរងអំពើហិង្សាបង្ហូរឈាមជាបន្តបន្ទាប់នៅក្នុងឆ្នាំ២០១៦កន្លងមកនេះ ប្រធានាធិបតីតួកគី លោក តាយីប អឺដូហ្គេន បាននិយាយថា អំពើហិង្សានេះមានបំណងបង្កចលាចលប៉ុន្តែ លោកប្ដេជ្ញាថា តួកគីនឹងមិនចុះចាញ់ចំពោះការគំរាមកំហែងបែបនេះឡើយ។
ការបាញ់រះនៅក្លឹបកម្សាន្តនេះ បានផ្ទុះឡើងនៅពេលឆ្នាំ២០១៧ចូលមកដល់បានត្រឹមតែ ៧៥នាទីប៉ុណ្ណោះ ខណៈមនុស្សម្នាកំពុងឆ្លងឆ្នាំចាស់ឈានចូលឆ្នាំថ្មី ដែលឆ្នាំចាស់ត្រូវបានគេមើលឃើញថា មានមនុស្សស្លាប់រាប់រយនាក់នៅក្នុងអំពើហិង្សាវាយប្រហារនានា និងរដ្ឋប្រហារមិនបានសម្រេច។
នៅក្នុងការវាយប្រហារកាលពីថ្ងៃម្សិលមិញនេះ ខ្មាន់កាំភ្លើងបានបាញ់សម្លាប់ប៉ូលិសម្នាក់ និងជនស៊ីវិលម្នាក់ នៅច្រកចូលក្លឹប ហើយបន្ទាប់មក បានបាញ់រះទៅលើមនុស្សម្នាក់ដែលកំពុងប្រារព្ធពិធីឆ្លងឆ្នាំនៅក្នុងក្លឹបនោះ ជាទីដែលទូរទស្សន៍ NTV ផ្សាយថា មានមនុស្សដល់ទៅ ៧០០នាក់ឯណោះ។
ទូរទស្សន៍ បានរាយការណ៍ថា ខ្មាន់កាំភ្លើងបានបាញ់រះប្រហែល ១២០ ទៅ ១៨០គ្រាប់ នៅក្នុងរយៈពេលត្រឹមតែ ៧នាទីប៉ុណ្ណោះ៕
