រដ្ឋាភិបាលភូមា នៅថ្ងៃនេះ បានសន្យាស៊ើបអង្កេតទៅលើវីដេអូមួយ ដែលបង្ហាញប៉ូលិសវាយទាត់ធាក់ទៅលើជនស៊ីវិលរ៉ូហ៊ីងយ៉ា ដោយវាបង្ហាញថា អាជ្ញាធរអាចបានរំលោភបំពានទៅលើក្រុមជនជាតិភាគតិចរ៉ូហ៊ីងយ៉ា។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
បើតាម AFP មនុស្សរាប់ម៉ឺននាក់មកពីតំបន់ជនជាតិភាគតិច បានរត់ភៀសខ្លួនគេចចេញពីប្រតិបត្តិការយោធានៅក្នុងរដ្ឋរ៉ាក់ឃីន បន្ទាប់ពីការវាយប្រហារទៅលើប៉ុស្តិ៍ប៉ូលិសនៅតាមព្រំដែន។
ប្រទេសបង់ក្លាដែសនិយាយថា ជនជាតិរ៉ូហ៊ីងយ៉ាប្រហែល ៥ម៉ឺននាក់ បានរត់ភៀសខ្លួនឆ្លងដែនក្នុងរយៈពេលជាង ២ខែមកនេះ។ ជនជាតិរ៉ូហ៊ីងយ៉ាជាច្រើន រងងការរំលោភផ្លូវភេទ ឃាតកម្ម និងឆក់ប្លន់ នៅក្រោមកងកម្លាំងសន្តិសុខរបស់ភូមា។
រឿងរ៉ាវរបស់ពួកគេ បានជំរុញឲ្យពិភពលោកភ្ញាក់ផ្អើល ហើយតវ៉ាទៅនឹងមេដឹកនាំភូមាអ្នកស្រី អ៊ុងសាន ស៊ូជី ដែលត្រូវបានគេចោទថា មិនបានខិតខំឲ្យបានគ្រប់គ្រាន់ដើម្បីជួយជនជាតិរ៉ូហ៊ីងយ៉ានោះឡើយ៕
