ក្រុមមន្ត្រីប្រទេសនេះ និយាយថា ក្រុមប្រដាប់អាវុធមានទំនាក់ទំនងនឹងក្រុមបះបោរបំបែកខ្លួនមូស្លីម បានវាយប្រហារទៅលើមណ្ឌលឃុំឃាំងមួយ នៅភាគខាងត្បូងប្រទេសនេះ នៅថ្ងៃនេះ ដោយបានសម្លាប់សន្តិសុខយាមគុកម្នាក់ និងបានរំដោះអ្នកទោស ១៣២នាក់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានរាយការណ៍ថា ការប្រយុទ្ធគ្នារយៈពេល ២ម៉ោង បានផ្ទុះឡើងនៅពេលក្រុមប្រដាប់អាវុធជាង ១០០នាក់ បានវាយប្រហារទៅលើពន្ធនាគារ នៅតំបន់កូតាបាតូ ដោយបានយកឈ្នះលើក្រុមឆ្មាំគុក និងរំដោះអ្នកទោសឲ្យរត់គេចខ្លួន។
ប្រធានមណ្ឌលឃុំឃាំង លោក Peter John Bonggat បាននិយាយថា ការវាយប្រហារនៅព្រឹកព្រលឹមថ្ងៃនេះ ត្រូវបានធ្វើឡើងក្រោយក្រុមបំបែកខ្លួន ស្ថិតក្នុងក្រុមឧទ្ទាមមូស្លីមឈ្មោះរណសិរ្សរំដោះឥស្លាមម៉ូរ៉ូ។
ប៉ុន្តែ AFP មិនអាចសុំការបញ្ជាក់បានភ្លាមៗពីមន្ត្រីប៉ូលិស និងយោធាបានភ្លាមៗនៅឡើយទេ ទាក់ទងនឹងអត្តសញ្ញាណក្រុមប្រដាប់អាវុធទាំងនោះ និងហេតុផលនៃការទម្លាយពន្ធនាគារនោះ ប៉ុន្តែ បានចាប់ផ្ដើមប្រតិបត្តិការតាមចាប់ខ្លួនជនវាយប្រហារ និងអ្នករត់គេចខ្លួនទាំងនោះមកវិញ។
តំបន់មិនដាណាវ ស្ថិតនៅភាគខាងត្បូងហ្វីលីពីន បានស្ថិតនៅក្រោមស្ថានភាពអសន្តិសុខអស់រាប់ទសវត្សរ៍មកហើយ ដោយសារតែក្រុមបះបោរមូស្លីម ព្រមទាំងក្រុមឧក្រិដ្ឋនអន្ធពាលមួយចំនួន ដែលនៅក្នុងនោះ មានអ្នកខ្លះប្រកាសថា ជាសាខារបស់ក្រុមរដ្ឋឥស្លាមផងដែរ៕
