ក្រសួងការបរទេសចិន បាននិយាយកាលពីថ្ងៃម្សិលមិញថា ការខិតខំព្យាយាមបញ្ចុះបញ្ចូលរបស់ចិនឲ្យកូរ៉េខាងជើងរំសាយកម្មវិធីនុយក្លេអ៊ែរ គឺជារឿងពិតមិនអាចប្រកែកបាន។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
បើតាម Reuters ក្រសួងការបរទេសចិន បានអះអាងដូច្នេះ បន្ទាប់ពីប្រធានាធិបតីជាប់ឆ្នោតអាមេរិក លោក ដូណាល់ ត្រាំ បាននិយាយថា ក្រុងប៉េកាំងមិនជួយគ្រប់គ្រងប្រទេសកូរ៉េខាងជើងនោះឡើយ។
មេដឹកនាំកូរ៉េខាងជើង លោក គីម ជុងអ៊ុន បានថ្លែងកាលពីថ្ងៃអាទិត្យកន្លងមកនេះថា ប្រទេសរបស់លោក ជិតចាប់ផ្ដើមសាកល្បងគ្រាប់មីស៊ីលឆ្លងទ្វីបហើយ ដែលជំរុញឲ្យមានមន្ទិលសង្ស័យថា គ្រាប់មីស៊ីលនោះអាចបាញ់ទៅដល់ទឹកដីអាមេរិក។
ប៉ុន្តែ លោក ត្រាំ បានទាត់ចោលការអះអាងបែបនេះរបស់លោក គីម ដោយនិយាយថា វានឹងមិនអាចទៅរួចនោះឡើយ។
លោក ត្រាំ បានព្រាងគោលនយោបាយស្ដីពីប្រទេសកូរ៉េខាងជើងរួចហើយ ប៉ុន្តែ អំឡុងយុទ្ធនាការបោះឆ្នោតកាលពីឆ្នាំមុន លោកប្រាប់ថា លោកមានឆន្ទៈជជែកជាមួយមេដឹកនាំក្រុងព្យុងយ៉ាង ដើម្បីផ្ដល់ឱកាសដល់ប្រទេសមួយនេះ។
លោក ត្រាំ ក៏បានរិះគន់ចិនជុំវិញបញ្ហាកូរ៉េខាងជើងផងដែរ។ កាលពីថ្ងៃចន្ទកន្លងមក លោក ត្រាំ និយាយថា ចិនបានទទួលប្រយោជន៍ពីទំនាក់ទំនងសេដ្ឋកិច្ចជាមួយអាមេរិក ប៉ុន្តែ បែរជាមិនប្រើប្រាស់ឥទ្ធិពលរបស់ខ្លួន ដើម្បីជួយគ្រប់គ្រងកូរ៉េខាងជើងនោះឡើយ។
ជាការឆ្លើយតបនឹងលោក ត្រាំ អ្នកនាំពាក្យក្រសួងការបរទេសចិន លោក ហ្គឹង ហ្សួង បាននិយាយថា ចិនកំពុងតែជំរុញឲ្យមានការរំសាយកម្មវិធីនុយក្លេអ៊ែរនៅឧបទ្វីបកូរ៉េ៕
