តំណាងសហគមន៍មានជម្លោះដីធ្លីនៅក្នុងរាជធានីភ្នំពេញ បានឲ្យដឹងថា ពួកគេគ្រោងនឹងបន្តយុទ្ធនាការថ្ងៃចន្ទពណ៌ខ្មៅនៅថ្ងៃស្អែកនេះ ជាយុទ្ធនាការដែលបានឈានដល់សប្ដាហ៍ទី ៣៧ហើយ ដើម្បីទាមទារឲ្យដោះលែងសកម្មជនការពារសិទ្ធិមនុស្ស ៤រូប មន្ត្រីរៀបចំការបោះឆ្នោតមួយរូប និងសកម្មជនដីធ្លីមួយរូប។
មន្ត្រីការពារសិទ្ធិមនុស្សនៃសមាគមអាដហុក ៤រូប មានលោក នី សុខា លោក យី សុខសាន្ត លោក ណៃ វង់ដា និងអ្នកស្រី លឹម មុន្នី និងអគ្គលេខាធិការរង គ.ជ.ប. លោក នី ចរិយា កំពុងស្ថិតនៅក្រោមការឃុំខ្លួនរហូតមកដល់ពេលនេះ ចាប់តាំងពីពួកគេត្រូវបានចាប់ខ្លួនកាលពីដើមខែឧសភាឆ្នាំមុន ក្រោមការចោទប្រកាន់ពីបទសូកប៉ាន់សាក្សី និងសមគំនិតក្នុងរឿងសូកប៉ាន់សាក្សី នៅក្នុងសំណុំរឿងរបស់កញ្ញា ខុម ចាន់តារាទី ហៅ ស្រីមុំ ដែលត្រូវបានគេទម្លាយថា មានស្នេហាដ៏ចម្រូងចម្រាស់ជាមួយមេដឹកនាំបក្សប្រឆាំង លោក កឹម សុខា។
ចំណែកតំណាងសហគមន៍បឹងកក់ អ្នកស្រី ទេព វន្នី ត្រូវបានសមត្ថកិច្ចចាប់ខ្លួនជាថ្មីកាលពីពាក់កណ្ដាលខែសីហាឆ្នាំមុន ក្រោមការចោទថា សកម្មជនរូបនេះ បានជេរប្រមាថមន្ត្រីរាជការសាធារណៈ។
អ្នកវិភាគនយោបាយដ៏មានប្រជាប្រិយភាព លោក កែម ឡី ត្រូវបានខ្មាន់កាំភ្លើងបាញ់សម្លាប់នៅក្នុងម៉ាត ក្នុងការ៉ាស់សាំងកាល់តិច ស្ថិតនៅម្ដុំស្តុបបូកគោ កាលពីថ្ងៃទី១០ ខែកក្កដាឆ្នាំមុន។
តំណាងសហគមន៍បឹងកក់ កញ្ញា សុង ស្រីលាភ បានប្រាប់វីអូឌីនៅរសៀលថ្ងៃនេះថា សហគមន៍បឹងកក់ នឹងបន្តយុទ្ធនាការថ្ងៃចន្ទពណ៌ខ្មៅដូចធម្មតា នៅព្រឹកថ្ងៃស្អែកនេះ នៅក្នុងសហគមន៍ផ្ទាល់ ដើម្បីផ្ញើសារទៅរដ្ឋាភិបាល និងគណបក្សនយោបាយ ឲ្យបញ្ឈប់ការប្រើប្រាស់អ្នកជាប់ឃុំទាំង ៦រូប ធ្វើជាចំណាប់ខ្មាំងនយោបាយ។ កញ្ញាបន្តថា យុទ្ធនាការនេះ ក៏ទាមទារឲ្យរដ្ឋាភិបាលស្វែងរកយុត្តិធម៌ករណីឃាតកម្មលើអ្នកវិភាគនយោបាយ លោក កែម ឡី ផងដែរ។
ចំណែកតំណាងសហគមន៍បុរីកីឡា អ្នកស្រី ស ស៊ន បានឲ្យដឹងថា សហគមន៍របស់អ្នកស្រីគ្រោងនឹងចូលរួមជាមួយសហគមន៍បឹងកក់ សម្រាប់រៀបចំយុទ្ធនាការថ្ងៃចន្ទអាវខ្មៅនៅថ្ងៃស្អែកនេះ។
យុទ្ធនាការថ្ងៃចន្ទអាវខ្មៅ ត្រូវបានសហគមន៍មានជម្លោះដីធ្លី និងក្រុមអង្គការសង្គមស៊ីវិល រៀបចំធ្វើឡើងនៅរៀងរាល់ថ្ងៃចន្ទ ដោយឈានមកដល់សប្ដាហ៍ទី ៣៧ ហើយនៅថ្ងៃស្អែកនេះ ខណៈដែលអ្នកជាប់ឃុំទាំង ៦រូប បន្តជាប់ឃុំនៅឡើយ ហើយការស៊ើបអង្កេតទៅលើករណីឃាតកម្មលើលោក កែម ឡី មិនទាន់ត្រូវបានអាជ្ញាធរកម្ពុជាប្រកាសឲ្យដឹងជាសាធារណៈនៅឡើយទេ៕
