ប្រទេសចិនគ្រោងចំណាយទឹកប្រាក់ជិត ៣៧ពាន់លានដុល្លាររហូតដល់ឆ្នាំ២០២០ ដើម្បីដោះស្រាយបញ្ហាកំណើនសំរាមនៅក្នុងប្រទេសនេះ។ នេះដោយយោងតាមការចុះផ្សាយរបស់សារព័ត៌មាន Channel News Asia។
សារព័ត៌មាននេះ បានចុះផ្សាយបន្តថា គណៈកម្មការកំណែទម្រង់ និងអភិវឌ្ឍន៍ជាតិ គ្រោងបង្វែថវិកា ២ភាគ៣ ទៅរកវិធីសុវត្ថិភាពក្នុងការរំលាយកាកសំណល់ពីផ្ទះសម្បែង ក្នុងនោះមានទាំងការដុតចោល ការចាក់ដីលុប និងការកែច្នៃឡើងវិញ។
គណៈកម្មការនេះ បាននិយាយថា កញ្ចប់ថវិកានេះ មានបំណងកាត់បន្ថយការបំពុលទឹក និងដី ដែលបង្កឡើងដោយកាក់សំណល់។
មន្ត្រីម្នាក់នៅគណៈកម្មការនោះ បាននិយាយផងដែរថា នៅពីរបីសប្ដាហ៍ខាងមុខ បទប្បញ្ញត្តិមួយនឹងត្រូវបានគេប្រកាស ដែលតម្រូវឲ្យពលរដ្ឋ និងក្រុមហ៊ុនឯកជន បែងចែកកាក់សំណល់។
គណៈកម្មការនេះ បាននិយាយថា ប្រព័ន្ធនេះនឹងត្រូវបង្កើតឡើងនៅឆ្នាំ២០២០ សម្រាប់បែងចែកកាក់សំណល់តាមផ្ទះ នៅតាមតំបន់ខ្លះក្នុងប្រទេសចិន ដូចជា ទីក្រុងប៉េកាំង ទីក្រុងឈុងជីង ទីក្រុងស៊ាងហៃ និងទីក្រុងធានជិន៕
