នាវាទេសចរណ៍មួយផ្ទុកមនុស្ស ៣១នាក់ ត្រូវបានគេរាយការណ៍ថា កំពុងបាត់ខ្លួន ក្រោយពីមិនបានវិលត្រឡប់ពីដំណើរកម្សាន្ត នៅក្នុងរដ្ឋសាបាហ៍ របស់ប្រទេសម៉ាឡេស៊ី កាលពីថ្ងៃម្សិលមិញ។ នេះដោយយោងតាមការចុះផ្សាយរបស់សារព័ត៌មាន News Straits Times។
សារព័ត៌មាននេះ បានផ្សាយបន្តថា ទូកដឹកមនុស្សចំនួន ២៨នាក់ មកពីប្រទេសចិន រួមជាមួយសមាជិកនាវា ៣នាក់ បានធ្វើដំណើរទៅកាន់តំបន់ Pulau Mengalum កាលពីព្រឹកថ្ងៃម្សិលមិញ។
ទីភ្នាក់ងារប្រតិបត្តិការដែនសមុទ្រម៉ាឡេស៊ី បាននិយាយថា ប្រតិបត្តិការស្វែងរក និងជួយសង្គ្រោះនាវាកំពុងបាត់ខ្លួននោះ ត្រូវបានចាប់ផ្ដើមកាលពីយប់ម្សិលមិញ បន្ទាប់ពីគេរាយការណ៍ថា បានបាត់ខ្លួននៅម៉ោងប្រហែល ១០យប់។
មន្ត្រីព័ត៌មាននៃទីភ្នាក់ងារខាងលើ បានប្រាប់ថា ប្រតិបត្តិការស្វែងរក គ្របដណ្ដប់ទៅលើផ្ទៃទឹកប្រហែល ៤០០ម៉ៃយ៍ការ៉េ ហើយទីភ្នាក់ងារនេះក៏បានជូនដំណឹងទៅកងទ័ពអាកាសម៉ាឡេស៊ី ឲ្យស្វែងរកពីលើអាកាសផងដែរ។
មន្ត្រីចិនប្រចាំប្រទេសម៉ាឡេស៊ី បានប្រាប់ទីភ្នាក់ងារព័ត៌មានស៊ិនហួរថា ស្ថានកុងស៊ុលចិននៅតំបន់ Kota Kinabalu បានស្នើទៅរដ្ឋាភិបាលប្រចាំរដ្ឋសាបាហ៍ ឲ្យបង្កើនកិច្ចខិតខំប្រឹងប្រែងស្វែងរកនាវាដែលកំពុងបាត់ខ្លួនផងដែរ៕