ប្រទេសជប៉ុនកំពុងតែរៀបចំផែនការដើម្បីបង្ហាញទៅប្រធានាធិបតីអាមេរិក លោក ដូណាល់ ត្រាំ ថា បណ្ដាក្រុមហ៊ុនជប៉ុន បានត្រៀមខ្លួនរួចហើយដើម្បីបង្កើតការងារសម្រាប់អាមេរិក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានផ្សាយថា ការត្រៀមលក្ខណៈរបស់ជប៉ុន ធ្វើឡើងចំពេលដែលនាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាបេ ត្រៀមរៀបចំជួបជាមួយមេដឹកនាំអាមេរិក ដើម្បីនិយាយអំពីវិស័យពាណិជ្ជកម្មរថយន្ត។
លោក អាបេ គ្រោងទៅទស្សនកិច្ចទីក្រុងវ៉ាស៊ីងតោន នៅថ្ងៃទី១០ ខែកុម្ភៈ ដើម្បីជជែកជាមួយលោក ត្រាំ ដែលគេរំពឹងថា ជំនួបនោះនឹងជំរុញវឌ្ឍនភាពនៃកិច្ចព្រមព្រៀងពាណិជ្ជកម្មទ្វេភាគី។
សេចក្ដីព្រាងឯកសារមួយ ដែលគេហៅថា “គំនិតផ្ដួចផ្ដើមសម្រាប់ការងារ និងកំណើនពាណិជ្ជកម្មអាមេរិក” នោះ បានដាក់ចេញនូវវិស័យសំខាន់ៗចំនួន ៥ ក្នុងនោះមានទាំងវិស័យហេដ្ឋារចនាសម្ព័ន្ធផងដែរ។ ឯកសារនោះ មិនបានលើកឡើងអំពីពាណិជ្ជកម្មរថយន្តនោះឡើយ ខណៈលោក ត្រាំ ចាត់ទុកពាណិជ្ជកម្មរថយន្តរវាងអាមេរិក និងជប៉ុន មានលក្ខណៈមិនស្មើភាពគ្នា។
ឯកសារនេះពុំបានបង្ហាញពីទំហំការងារដែលគេគ្រោងបង្កើតឡើង និងទំហំវិនិយោគនោះឡើយ ប៉ុន្តែ ប្រភពមួយពីខាងរដ្ឋាភិបាលបាននិយាយថា ការងាររាប់រយពាន់កន្លែងអាចកើតចេញពីការវិនិយោគនេះ។
ទោះជាយ៉ាងណា ក្រុមមន្ត្រីជប៉ុននិយាយថា ពួកគេនៅតែព្យាយាមវាយតម្លៃទៅលើអ្វីដែលលោក ត្រាំ ចង់បានពីជប៉ុន។ ក្រៅពីវិស័យរថយន្ត លោក ត្រាំ ក៏បានចាត់បញ្ចូលជប៉ុនចូលជាមួយចិន និងប្រទេសម៉ិកស៊ិក ជាអ្នកចូលរួមចំណែកយ៉ាងធំក្នុងអតុល្យភាពនៃជញ្ជីងពាណិជ្ជកម្មអាមេរិក៕
