អតីតអគ្គលេខាធិការអង្គការសហប្រជាជាតិ លោក បាន គីមូន បានប្រកាសនៅថ្ងៃនេះថា លោកនឹងមិនឈរឈ្មោះធ្វើជាប្រធានាធិបតីនៃប្រទេសរបស់លោកនោះឡើយ។ នេះដោយយោងតាមការចុះផ្សាយរបស់សារព័ត៌មាន Channel News Asia។
លោក បាន គីមូន បានវិលត្រឡប់ទៅប្រទេសកំណើតវិញកាលពីសប្ដាហ៍មុន បន្ទាប់ពីដឹកនាំអង្គការសហប្រជាជាតិនៅទីក្រុងញូវយ៉កអស់រយៈពេល ១ទសវត្សរ៍កន្លងមក ហើយលោកត្រូវបានគេរំពឹងយ៉ាងទូលំទូលាយថា នឹងឈរឈ្មោះនៅក្នុងការបោះឆ្នោតនៅឆ្នាំនេះ ប៉ុន្តែ បេក្ខភាពរបស់លោក ជួបប្រទះនឹងបញ្ហាជាហូរហែរ។
លោក បាន គីមូន បានប្រាប់អ្នកសារព័ត៌មានក្នុងសន្និសីទកាសែតមួយថា លោកនឹងដកខ្លួនពីនយោបាយ ហើយលោកសុំទោសដែលធ្វើឲ្យមនុស្សជាច្រើនខកចិត្ត។
បើទោះបីជាលោកមិនដែលប្រកាសជាផ្លូវការថា លោកនឹងឈរឈ្មោះជាផ្លូវការក៏ដោយ អតីតប្រមុខអង្គការសហប្រជាជាតិរូបនេះ បានបង្ហាញមុខជាសាធារណៈជាហូរហែរ ហើយត្រូវបានគេរំពឹងទុកយ៉ាងទូលំទូលាយថា នឹងចូលរួមក្នុងគណបក្ស Saenuri របស់ប្រធានាធិបតី អ្នកស្រី ផាក ហ្គឹនហេ ឬក៏រួបរួមគ្នាជាមួយក្រុមអភិរក្សដែលបំបែកខ្លួនចេញពីគណបក្សនេះ សម្រាប់ការបោះឆ្នោតជ្រើសរើសប្រធានាធិបតីនាពេលខាងមុខនេះ។
មានអាជីពជាអ្នកកាទូតម្នាក់ លោក បាន គីមូន មិនដែលចូលរួមក្នុងគណបក្សនយោបាយណាមួយរបស់កូរ៉េខាងត្បូងនោះឡើយ បើទោះបីជាលោកធ្លាប់បម្រើការជារដ្ឋមន្ត្រីការបរទេស នៅក្រោមអតីតប្រធានាធិបតី លោក រ៉ូ មូហ្យុន ចន្លោះឆ្នាំ២០០៤ ដល់ឆ្នាំ២០០៦ក៏ដោយ៕
