មន្ត្រីរដ្ឋាភិបាលកម្ពុជា បានអះអាងថា លោកនាយករដ្ឋមន្ត្រី ហ៊ុន សែន មិនបានលើកឡើងពីបញ្ហាជនជាតិរ៉ូហ៊ីងយ៉ានោះឡើយ នៅអំឡុងជំនួបរបស់លោកជាមួយប្រធានាធិបតីភូមា លោក ធិន ច (U Htin Kyaw) នៅថ្ងៃនេះ ដោយចាត់ទុកថា នោះគឺជាបញ្ហាផ្ទៃក្នុងរបស់ប្រទេសភូមា។
លោក ធិន ច ប្រធានាធិបតីមីយ៉ាន់ម៉ា បានដឹកនាំគណៈប្រតិភូមកធ្វើទស្សនកិច្ចផ្លូវការនៅកម្ពុជា រយៈពេល ៤ ថ្ងៃ ចាប់ពីថ្ងៃទី ០៣ ខែ កុម្ភៈ រហូតដល់ថ្ងៃទី ០៦ ខែដដែលនេះ តាមការអញ្ជើញរបស់ព្រះមហាក្សត្រខ្មែរ
រដ្ឋមន្ត្រីព័ត៌មាន លោក ខៀវ កាញារីទ្ធ បានបង្ហោះសារនៅលើទំព័រហ្វេសប៊ុករបស់លោកនៅថ្ងៃនេះថា លោកនាយករដ្ឋមន្ត្រី ហ៊ុន សែន មិនយល់ស្របទៅលើការធ្វើអន្តរជាតូបនីយកម្មចំពោះជនជាតិរ៉ូហ៊ីយ៉ានោះឡើយ។
លោកបញ្ជាក់នៅក្នុងបណ្តាញសង្គមហ្វេសប៊ុករបស់លោកថា៖ “យើងខ្ញុំ មិនយល់ស្របលើការប៉ុនប៉ងធ្វើអន្តរជាតូបនីយកម្មបញ្ហា រ៉ូហ៊ីងយ៉ា ទេ ហើយចាត់បញ្ហានេះជាបញ្ហាផ្ទៃក្នុងរបស់មីយ៉ាន់ម៉ា ដែលធម្មនុញ្ញអាស៊ានហាមឃាត់ការលូកដៃពីសមាជិកអាស៊ានផងគ្នា”។
របាយការណ៍អង្គការសហប្រជាជាតិ បានអះអាងថា មនុស្សប្រហែល ៦ម៉ឺន ៦ពាន់នាក់ បានរត់ភៀសចេញពីរដ្ឋរ៉ាក់ឃីន ស្ថិតនៅភាគខាងជើងប្រទេសភូមា ចាប់តាំងពីពួកយោធាចាប់ផ្ដើមប្រតិបត្តិការសន្តិសុខ ជាការឆ្លើយតបទៅនឹងការវាយប្រហារទៅលើប៉ុស្តិ៍ប៉ូលិសព្រំដែន កាលពីថ្ងៃទី០៩ ខែតុលាឆ្នាំមុន៕
