ក្រុមហ៊ុនបច្ចេកវិទ្យាអាមេរិកចំនួន ៣០ទៀត បានចុះហត្ថលេខាលើញ្ញត្តិខ្លីមួយ ប្រឆាំងទៅនឹងបម្រាអន្តរប្រវេសន៍របស់ប្រធានាធីបតីអាមេរិក លោក ដូណាល់ ត្រាំ ដែលធ្វើឲ្យចំនួនក្រុមហ៊ុនបច្ចេកវិទ្យាជំទាស់នឹងបទបញ្ជាលោក ត្រាំ កើនចំនួនដល់ទៅ ១២៧ក្រុមហ៊ុនហើយ។ នេះដោយយោងតាមការចុះផ្សាយរបស់សារព័ត៌មាន BBC។
បើតាម BBC ក្រុមហ៊ុនបច្ចេកវិទ្យាទាំងនោះ មានក្រុមហ៊ុន Tesla ក្រុមហ៊ុន Adobe ក្រុមហ៊ុន HP និងក្រុមហ៊ុន Evernote។
ក្រុមហ៊ុនទាំងនេះ បានចូលរួមជាមួយក្រុមហ៊ុនចំនួន ៩៧ទៀត ដែលបានដាក់ឯកសារផ្លូវច្បាប់ លើកឡើងថា បទបញ្ជារបស់លោក ត្រាំ បង្កឲ្យមានផលប៉ះពាល់ធ្ងន់ធ្ងរទៅដល់ជំនួញរបស់ពួកគេ ហើយបទបញ្ជានោះមិនស្របនឹងរដ្ឋធម្មនុញ្ញនោះឡើយ។
ញ្ញត្តិនោះ ត្រូវបានគេដាក់នៅទីក្រុងវ៉ាស៊ីងតោនកាលពីថ្ងៃអាទិត្យកន្លងមកនេះ ហើយក្នុងនោះមានទាំងហត្ថលេខារបស់ក្រុមហ៊ុន Apple ក្រុមហ៊ុន Facebook និងក្រុមហ៊ុន Microsoft ផងដែរ។
បទបញ្ជាលោក ត្រាំ បានហាមឃាត់កម្មវិធីទទួលជនភៀសខ្លួនទាំងអស់រយៈពេល ១២០ថ្ងៃ ដោយបានហាមឃាត់ជនភៀសខ្លួនស៊ីរីទាំងស្រុង និងបានហាមឃាត់ពលរដ្ឋមកពីបណ្ដាប្រទេសមូស្លីមចំនួន ៧ មិនឲ្យចូលទឹកដីអាមេរិក។
ប៉ុន្តែ ចៅក្រមនៃតុលាការសហព័ន្ធនៅទីក្រុងវ៉ាស៊ីងតោន បានសម្រេចឲ្យផ្អាកបទបញ្ជារបស់លោក ត្រាំ ទៅវិញ កាលពីថ្ងៃសុក្រសប្ដាហ៍មុន។
សេចក្ដីសម្រេចរបស់ចៅក្រមសហព័ន្ធនេះ មានន័យថា ពលរដ្ឋមកពីប្រទេសអ៊ីរ៉ាក់ ស៊ីរី អ៊ីរ៉ង់ លីប៊ី សូម៉ាលី ស៊ូដង់ និងយ៉េមែន នឹងត្រូវអនុញ្ញាតឲ្យធ្វើដំណើរទៅអាមេរិកឡើងវិញ។
ទោះជាយ៉ាងណា លោក ត្រាំ និយាយថា លោកនឹងប្រឆាំងនឹងសេចក្ដីសម្រេចរបស់តុលាការ ដោយសារវាបានធ្វើឲ្យសន្តិសុខជាតិស្ថិតក្នុងហានិភ័យ៕
