លោក Michael Flynn ទីប្រឹក្សាសន្តិសុខជាតិរបស់ប្រធានាធិបតីអាមេរិក លោក ដូណាល់ ត្រាំ បានប្រកាសលាលែងពីតំណែងនៅល្ងាចថ្ងៃនេះ បន្ទាប់ពីមានការទម្លាយថា លោកបានបានជជែកគ្នាជាមួយអគ្គរដ្ឋទូតរុស្ស៊ីប្រចាំអាមេរិក អំពីទណ្ឌកម្មរបស់អាមេរិកទៅលើប្រទេសរុស្ស៊ី មុននឹងលោក ត្រាំ ចូលកាន់តំណែងជាផ្លូវការ និងនាំឲ្យអនុប្រធានាធិបតីអាមេរិក លោក Mike Pence យល់ខុសអំពីកិច្ចសន្ទនានោះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ការលាលែងរបស់លោក Flynn បានកើតឡើងតែប៉ុន្មានម៉ោងក្រោយពីមានសេចក្ដីរាយការណ៍ថា ក្រសួងយុត្តិធម៌ បានព្រមានសេតវិមានប៉ុន្មានសប្ដាហ៍កន្លងមកថថា លោក Flynn អាចនឹងក្លាយជាជនរងគ្រោះនៃការចាប់បង្ខំ ដោយសារតែការទាក់ទងជាមួយអគ្គរដ្ឋទូតរុស្ស៊ី លោក Sergey Kislyak មុននឹងលោក ត្រាំ ឡើងកាន់តំណែងកាលពីថ្ងៃទី២០ ខែមករាកន្លងមកនេះ។
ប្រព័ន្ធផ្សព្វផ្សាយអាមេរិកចុះផ្សាយថា អាណត្តិរបស់លោក Flynn ជាទីប្រឹក្សាសន្តិសុខជាតិ ត្រូវបានគេនិយាយ មានរយៈពេលខ្លីបំផុតមិនធ្លាប់មាន។
ការចាកចេញរបស់ទីប្រឹក្សារូបនេះ អាចបង្អាក់ដំណើររបស់លោក ត្រាំ ដែលមានបំណងកសាងទំនាក់ទំនងល្អជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន។
លោក Flynn បានបញ្ជូនពាក្យលាលែងតែប៉ុន្មានម៉ោងប៉ុណ្ណោះ ក្រោយពីលោក ត្រាំ បានបដិសេធថ្លែងគាំទ្រលោក Flynn ជាសាធារណៈ ដោយថា លោកនឹងពិនិត្យមើលស្ថានការណ៍ និងជជែកជាមួយលោក Pence។
លោក Flyn បានសន្យានឹងលោក Pence ថា លោកមិនជជែករឿងទណ្ឌកម្មរបស់អាមេរិកជាមួយនឹងរុស្ស៊ីនោះឡើយ ប៉ុន្តែ សារដែលគេចាប់បាននោះ បង្ហាញថា ប្រធានបទនេះបានលេចឡើងនៅក្នុងកិច្ចសន្ទនារវាងរូបលោក និងអគ្គរដ្ឋទូតរុស្ស៊ី៕
