ក្រុមមន្ត្រីនៃគណៈកម្មាធិការព្រំដែនកម្ពុជា គ្រោងជួបប្រជុំជាមួយសមភាគីថៃ នៅបំណាច់ចុងខែកុម្ភៈនេះ នៅឯខេត្តសៀមរាប មុនកិច្ចប្រជុំផ្លូវការនៅខែក្រោយ។
ក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះ ក្រសួងការពារជាតិកម្ពុជា បានប្រកាសថា ក្រុមលេខាធិការដ្ឋាននៃគណៈកម្មាធិការព្រំដែនទូទៅកម្ពុជា-ថៃ នឹងជួបប្រជុំគ្នានៅឯខេត្តសៀមរាប ចាប់ពីថ្ងៃទី២៧ ខែកុម្ភៈ រហូតដល់ថ្ងៃទី០១ ខែមីនាខាងមុខ។
ក្រសួងការពារជាតិកម្ពុជា បានប្រកាសថា កិច្ចប្រជុំរវាងក្រុមមន្ត្រីកម្ពុជា និងសមភាគីថៃ ត្រូវបានគេគ្រោងរៀបចំឡើង ដើម្បីលើកកម្ពស់កិច្ចសហប្រតិបត្តិការរវាងកងទ័ពនៃប្រទេសទាំងពីរ នៅតាមបណ្ដោយព្រំដែនរួម។
ក្រសួងការពារជាតិកម្ពុជាបន្ថែមថា វាគឺជាការត្រៀមរៀបចំឆ្ពោះទៅកិច្ចប្រជុំផ្លូវការលើកទី ១២ នៃគណៈកម្មាធិការព្រំដែនទូទៅកម្ពុជា-ថៃ នៅក្នុងខែមីនាខាងមុខនេះ៕
