ធនាគារជាតិកម្ពុជា បានឲ្យដឹងថា ប្រជាជនមិនតិចជាង ២សែននាក់ នៅរាជធានីភ្នំពេញ បានប្រើប្រាស់កម្ចីឥណទានរបស់ធនាគារ និងគ្រឹះស្ថានមីក្រូហិរញ្ញវត្ថុ ដែលធ្វើឲ្យកម្រិតនៃការប្រើប្រាស់កម្ចីឥណទានរបស់ទីក្រុងនេះ ឈរនៅលំដាប់ទី ១ បើធៀបទៅនឹងបណ្ដាខេត្តដទៃទៀតនៅទូទាំងប្រទេសកម្ពុជា កាលពីឆ្នាំមុន។
ដោយបានដកស្រង់ទិន្ន័យចេញពីរបាយការណ៍ក្រេឌីតប៊ុយរូកម្ពុជាក្នុងឆ្នាំ២០១៦នោះ ធនាគារជាតិកម្ពុជា បានសរសេរនៅលើទំព័រហ្វេសប៊ុករបស់ខ្លួននៅថ្ងៃនេះថា ចំនួនអតិថិជនដែលទទួលបានឥណទានច្រើនជាងគេ គឺរាជធានីភ្នំពេញ ដែលមានអតិថិជនច្រើនជាង ២សែននាក់។
ធនាគារកណ្ដាលកម្ពុជា ក៏បានឲ្យដឹងផងដែរថា ខេត្តកណ្ដាល បានស្ថិតនៅលំដាប់ទីពីរ ដោយមានប្រជាជនប្រើប្រាស់កម្ចីឥណទានចន្លោះពី ១៥ម៉ឺននាក់ ទៅ ២សែននាក់។
ធនាគារជាតិកម្ពុជា បានបន្ថែមថា ក្នុងចំណោមខេត្តទាំងអស់នៅក្នុងប្រទេសកម្ពុជា ខេត្តកំពង់ស្ពឺ សៀមរាប កំពង់ចាម ព្រៃវែង តាកែវ កំពង់ធំ និងបាត់ដំបង សុទ្ធតែជាខេត្តដែលមានប្រជាជនប្រើប្រាស់កម្ចីឥណទានខ្ពស់ ស្ថិតនៅចន្លោះ ១០ម៉ឺននាក់ ទៅ ១៥ម៉ឺននាក់ គិតត្រឹមបំណាច់ឆ្នាំ២០១៦កន្លងមក៕