ក្រសួងយុត្តិធម៌បានចាត់ក្រុមអធិការកិច្ច ចុះស៊ើបអង្កេតករណីអនុប្រធានសាលាដំបូងខេត្តកំពង់ស្ពឺ ដែលគេថា បានយកកាំភ្លើងភ្ជង់ក្បាល និងយកឈើច្រត់ក្រឡាបញ្ជីជនពិការនៅខេត្តនេះ ទៅបោះចោល ដោយខឹងនឹងជនពិការរូបនោះ មិនព្រមផឹកស្រាតាមការបញ្ជារបស់ខ្លួន។
កាលពីថ្ងៃ០៩ មីនា ឆ្នាំ២០១៧ ក្រឡាបញ្ជីដែលពិការភាពជើងឈ្មោះ ឈៀវ គឹមហាក់ បានប្តឹងទៅក្រសួងយុត្តិធម៌ ដែលមានខ្លឹមសារថា «អនុប្រធានសាលាដំបូងខេត្តកំពង់ស្ពឺឈ្មោះ ម៉ែន វណ្ណៈ បានយកកាំភ្លើងភ្ជង់ក្បាលលោក និងបានបង្ខំឲ្យពិសាស្រាបៀកាលពីខែវិច្ឆិកាឆ្នាំ២០១៦ ហើយនៅថ្ងៃទី៦ មីនា អនុប្រធានសាលាដំបូងរូបនេះ បានយកឈើច្រត់របស់គាត់គ្រវាត់ចោលថែមទៀត»។
អ្នកនាំពាក្យក្រសួងយុត្តិធម៌លោក គឹម សន្តិភាព មានប្រសាសន៍ថា ក្រោយពីទទួលបានពាក្យបណ្តឹងរបស់ជនពិការរូបនោះ លោកថា នៅថ្ងៃសុក្រទី១០មីនានេះ ក្រុមអធិការកិច្ចឧត្តមក្រុមប្រឹក្សានៃអង្គចៅក្រមនិងចុះស្រាវជ្រាវនិងស៊ើបអង្កេតករណីនេះដោយថា បើរកឃើញភាពមិនប្រក្រតី ដូចការចោទប្រកាន់នៅក្នុងពាក្យបណ្តឹងមែន អនុប្រធានតុលាការរូបនោះ និងត្រូវឧត្តមក្រុមប្រឹក្សានៃអង្គចៅក្រមធ្វើការវិន័យ ដោយមិនទាន់គិតពីរឿងព្រហ្មទណ្ឌ។
លោកនិយាយថា៖ «ក្រុមប្រឹក្សាវិន័យ គឺពិនិត្យទៅលើវិន័យ បើសិនជាមានពាក់ព័ន្ធទៅដល់បទព្រហ្មទណ្ឌផ្សេងទៀត យើងអនុវត្តតាម ក្រមព្រហ្មទណ្ឌផ្សេងទៀត មិនគិតសំណុំរឿងព្រហ្មទណ្ឌទេ ការពិន័យ»។
លោក គឹម សន្តិភាព ប្រាប់ទៅមន្ត្រីអនុវត្តច្បាប់ទំាងអស់ ជាពិសេសមន្ត្រីតុលាការត្រូវគោរពច្បាប់ និងមានក្រមសីលធម៌ល្អ ដើម្បីជាគំរូសម្រាប់សង្គមជាតិ។
នៅថ្ងៃទី១០មីនានេះ អនុប្រធានសាលាដំបូងខេត្តកំពង់ស្ពឹលោក ម៉ែន វណ្ណៈ បានចេញសេចក្តីថ្លែងការណ៍ជាសាធារណៈ ដើម្បីសុំទោសលោក ឈៀវ គីមហាក់ ដោយថារាល់ទង្វើរបស់លោកចំពោះក្រឡាបញ្ជីជនពិការរូបនោះ គ្រាន់តែជាការលេងសើចក្នុងនាមជាមេ និងកូនចៅប៉ុណ្ណោះ។
សេចក្តីថ្លែងការមានខ្លឹមសារថា «កន្លងមកខ្ញុំលេងសើចជាមួយលោក ឈៀវ គីមហាក់ ជ្រុលហួសហេតុពេក ដែលបានយកឈើច្រត់ទៅក្រវែងចោល នាំឲ្យបាត់បង់កិត្តិយស និងសេចក្តីថ្លៃថ្នូររបស់លោកចំពោះមុខមហាជន និងក្រុមការងារជាមួយគ្នាប៉ុន្មានដងហើយ ដោយខ្ញុំយល់ថា នេះជាការលេងសើចរវាងមេនិងកូនចៅតែប៉ុណ្ណោះ ខ្ញុំសុំទោសលោក ឈៀវ គីមហាក់ ជាសាធារណៈ ហើយសូមលោក ឈប់ខឹង និងប្រកាន់ខ្ញុំតទៅទៀត»។
យ៉ាងណាក៏ដោយ VOD មិនអាចសុំការបំភ្លឺពីក្រឡាបញ្ជីជនពិការលោក ឈៀវ គឹមហាក់ បានទេនៅថ្ងៃនេះ។
ទោះជាយ៉ាងណាក្ដីនាយកប្រតិបត្តិអង្គការជនពិការកម្ពុជាលោក ងិន សៅរ័ត្ន បានចាត់ទុកសកម្មភាពដែលអនុប្រធានតុលាការលោក ម៉ែន វណ្ណៈ យកឈើច្រត់របស់ក្រឡាបញ្ជីជនពិការលោក ឈៀវ គឹមហាក់ បោះចោលនោះថា ជាការរើសអើងជនពិការ និងរំលោភច្បាប់ស្តីពីជនពិការផងដែរ។
លោកនិយាយថា៖ «បើយោងតាមច្បាប់ស្តីពី កិច្ចការពារនិងលើកកម្ពស់សិទ្ធិជនពិការ គឺច្បាប់ គេការពារថា រើសអើងមកលើជនពិការ ក្នុងករណីប្រសិនជាគាត់យកឈើច្រត់របស់គាត់ ដែលគាត់ប្រើយកទៅបោះចោលជាការរើសអើង ជាការម៉ាក់ងាយដល់រូបគាត់ដែលជាជនពិការ ច្បាប់យើងត្រូវបានគេហាមឃាត់មិនឲ្យមានការរើសអើង ដល់បងប្អូនជនពិការទេ»។
ចំណែកមេធាវី សំ សុគង់ បានពន្យល់តាមនីតិវិធីច្បាប់ថា អនុប្រធានតុលាការដែលប្រើអាវុធភ្ជង់ក្បាលមន្ត្រីក្រឡាបញ្ជីជនពិការនោះ តាមច្បាប់អ្នកប្រើអាវុធខុសច្បាប់ និងខុសក្រមសីលធម៌របស់តុលាការ។ លោកបញ្ជាក់ថា ករណីនេះ បើក្រុមអធិការកិច្ចមិនចាត់វិធានការច្បាប់ដាក់ទោសទណ្ឌដល់បុគ្គលនោះទេ និងធ្វើឲ្យប្រជាពលរដ្ឋអស់ជំនឿលើប្រព័ន្ធយុត្តិធម៌នៅកម្ពុជា។
លោកមានប្រសាសន៍ថា៖«បើធ្វើទៅមិនមានវិធានការ ឬក៏ចាត់វិធានការណាមួយ ជាមួយចៅក្រម ឬមួយព្រះរាជអាជ្ញាណាដែលគាត់ប្រព្រឹត្តមិនត្រឹមត្រូវ ខ្ញុំគិតថាវាធ្វើឲ្យប្រជាពលរដ្ឋទំាងអស់ ឬក៏អ្នកដែលមានរឿងក្តី ក្តាំនៅតុលាការ អស់ជំនឿលើស្ថាប័នតុលាការ ធ្វើឲ្យមន្ត្រីតុលាការ ចៅក្រម ព្រះរាជអាជ្ញាកាន់តែមិនខ្លាចការប្រព្រឹត្ត ហើយមិនគោរពច្បាប់ ហើយធ្វើអ្វីស្រែកតែអំពើចិត្ត»។
ទំាងមេធាវី និងមន្ត្រីផ្នែកជនពិការ បានអះអាងប្រហាក់ប្រហែលគ្នាថា អំពើគំរាមកំហែងដោយអាវុធ និងយកឈើច្រត់ជនពិការបោះចោល ជាការរំលោភលើច្បាប់ស្តីពីជនពិការ និងក្រមព្រហ្មទណ្ឌ។
ករណីនេះពួកគេថា ស្ថាប័នពាក់ព័ន្ធជាពិសេសក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រមមិនត្រូវមើលរំលង និងមិនត្រូវឲ្យផុតពីសំណាញ់ច្បាប់នោះទេ៕
