នាយករដ្ឋមន្ត្រីវៀតណាមប្រកាសគាំទ្រពេញទំហឹង ចំពោះធនាគារហេដ្ឋារចនាសម្ព័ន្ធអាស៊ី (AIIB) ដែលថា មានសារៈសំខាន់ចំពោះវៀតណាមនិងជាដៃគូល្អសម្រាប់ការអភិវឌ្ឍ។
នាយករដ្ឋមន្ត្រីវៀតណាមលោក Nguyen Xuan Phuc ថ្លែងបែបនេះនៅពេលលោកជួបជាមួយប្រធានធនាគារអភិវឌ្ឍន៍ហេដ្ឋារចនាសម្ព័ន្ធអាស៊ីនៅក្នុងទីក្រុងហាណូយ។
លោកថាកិច្ចសហប្រតិបត្តិការជាមួយធនាគារ AIIB គឺនាំមកផលប្រយោជន៍ច្រើនសម្រាប់វៀតណាមនិងជាដៃគូល្អឆ្ពោះទៅរកការអភិវឌ្ឍពិតប្រាកដ។ នេះបើតាមសារព័ត៌មានវៀតណាមញូ។
រដ្ឋាភិបាលវៀតណាមសង្ឃឹមថា AIIB នឹងក្លាយជាផ្នែកមួយ ក្នុងការជួយដល់វិស័យសាធារណៈ ដែលអាចជួយពង្រឹងលើវិស័យហេដ្ឋារចនាសម្ព័ន្ធ ឈានដល់ការជួយដល់វិស័យឯកជន។
ធនាគារ AIIB ជាធនាគារដែលផ្តោតលើការកសាងហេដ្ឋារចនាសម្ព័ន្ធនៅអាស៊ីប៉ាស៊ីភិច។ មានរដ្ឋជាសមាជិកជាង៥០ សុទ្ធតែជាសមាជិកស្ថាបនិក។ ធនាគារនេះផ្តួចផ្តើមបង្កើតឡើងដោយចិន ហើយបានដំណើរការផ្លូវការតាំងខែធ្នូឆ្នាំ២០១៥៕
