ប្រធានាធិបតីកោះតៃវ៉ាន់ អ្នកស្រី សៃ អ៊ឹងវ៉េន បានប្ដេជ្ញានៅថ្ងៃនេះថា តៃវ៉ាន់នឹងកសាងនាវាមុជទឹកផ្ទាល់ខ្លួន ខណៈដែលដែនដីកោះមួយនេះ សម្លឹងមើលការលក់អាវុធថ្មីៗពីសហរដ្ឋអាមេរិក ភ្ជាប់ទៅដោយបច្ចេកវិទ្យាសំខាន់ៗសម្រាប់នាវាមុជ ដើម្បីទប់ទល់នឹងការគំរាមកំហែងកាន់តែខ្លាំងពីប្រទេសចិន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ចិនមិនដែលបោះបង់ការប្រើប្រាស់កម្លាំងដើម្បីដណ្ដើមយកនូវអ្វីដែលខ្លួនចាត់ទុកជាខេត្តផ្ដាច់ខ្លួននោះឡើយ ហើយក្រសួងការពារកោះតៃវ៉ាន់ បាននិយាយថា ចិនមានគ្រាប់មីស៊ីលជាងមួយពាន់ដើម តម្រង់សំដៅទៅរកដែនកោះមួយនេះ។
អំឡុងពេលទៅទស្សនានាវាមុជទឹកនៅកំពង់ផែកងទ័ពជើងទឹក នៅចម្ងាយ ៣៥០គីឡូម៉ែត្រភាគខាងត្បូងទីក្រុងតៃប៉ិនោះ អ្នកស្រី សៃ បានថ្លែងថា ការពង្រឹងសមត្ថភាពប្រយុទ្ធនៅក្រោមទឹក គឺជារឿងចាំបាច់បំផុតនៅក្នុងវិស័យការពារកោះតៃវ៉ាន់។
អ្នកស្រីបន្ថែមថា វាគឺជាបញ្ហាដែលគ្រប់គ្នាបានទទួលស្គាល់ ហើយក្នុងនាមជាអគ្គបញ្ជាការ អ្នកស្រីប្ដេជ្ញាដោះស្រាយបញ្ហានេះ។
ប៉ុន្តែ ការបង្ហាញខ្លួនដោយកម្រនៃនាវាមុជទឹក ២គ្រឿង ក្នុងចំណោមនាវាមុជទឹក ៤គ្រឿងរបស់កោះតៃវ៉ាន់នៅអំឡុងពេលនោះ ក៏បង្ហាញឲ្យឃើញផងដែរពីដំណើរវវត្តន៍ដ៏យឺតយ៉ាវរបស់កោះនេះ ក្នុងការធ្វើទំនើបកម្មសម្ភារៈសឹកសំខាន់ៗសម្រាប់វិស័យយោធា៕









