អាមេរិកនៅថ្ងៃនេះ បានព្រមានថា ខ្លួនត្រៀមរួចរាល់ហើយដើម្បីវាយប្រហារប្រទេសស៊ីរីជាថ្មី បន្ទាប់ពីការវាយប្រហារទៅលើមូលដ្ឋានទ័ពអាកាសស៊ីរីកាលពីថ្ងៃម្សិលមិញនេះ ដែលជំរុញឲ្យក្រុងមូស្គូក្ដៅក្រហាយ ហើយបានបញ្ឆេះឲ្យមានការអំពាវនាវឲ្យមានដំណោះស្រាយខាងកាទូតថ្មី ដើម្បីបញ្ចប់សង្គ្រាមអស់រយៈពេល ៦ឆ្នាំមកនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
អគ្គរដ្ឋទូតអាមេរិកប្រចាំអង្គការសហប្រជាជាតិ អ្នកស្រី Nikki Haley បានថ្លែងសារព្រមានបែបនេះ នៅឯកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិ ជាទីដែលរុស្ស៊ីបានចោទរដ្ឋបាលប្រធានាធិបតី ដូណាល់ ត្រាំ ថា បានរំលោភលើច្បាប់អន្តរជាតិ និងបានបង្កទង្វើឈ្លានពានប្រឆាំងនឹងសម្ព័ន្ធរបស់ខ្លួន។
អ្នកស្រី Haley បានប្រាប់ទៅក្រុមប្រឹក្សាសន្តិសុខអង្គការសហប្រជាជាតិថា សហរដ្ឋអាមេរិក បានសម្រេចប្រកាន់យកជំហរដ៏ម៉ឹងម៉ាត់មួយកាលពីថ្ងៃម្សិលមិញ ហើយអាមេរិកបានត្រៀមវាយប្រហារបន្ថែមទៀត ប៉ុន្តែ សង្ឃឹមថា នឹងមិនចាំបាច់នោះទេ។
ជាការសងសឹកទៅនឹងការវាយប្រហារដោយអាវុធគីមី ដែលគេទម្លាក់កំហុសដាក់ទៅលើរដ្ឋាភិបាលលោក អាសាដ នោះ ការវាយប្រហារដោយគ្រាប់មីស៊ីលកាលពីថ្ងៃម្សិលមិញនេះ គឺជាការវាយប្រហារដោយផ្ទាល់ជាលើកដំបូងរបស់អាមេរិក ទៅលើរបបក្រុងដាម៉ាស់។
អាមេរិកបានបាញ់គ្រាប់មីស៊ីល Tomahawk ៥៩គ្រាប់ ចេញពីនាវានៅសមុទ្រមេឌីទែរ៉ាណេ ផ្លោងដាក់មូលដ្ឋានទ័ពអាកាសនៅជិតទីក្រុងហូម ភាគកណ្ដាលប្រទេសស៊ីរី៕