មន្ត្រីនគរបាល បានឲ្យដឹងថា ស្ត្រីម្នាក់ដែលស្ថិតក្នុងចំណោមអ្នករងរបួសធ្ងន់ធ្ងរពីរនាក់ ក្រោយការផ្ទុះឡចំហុយអ៊ុតខោអាវនៅសង្កាត់ស្ទឹងមានជ័យកាលពីថ្ងៃម្សិលមិញនោះ បានស្លាប់ហើយ បន្ទាប់ពីត្រូវបានបញ្ជូនទៅសង្គ្រោះនៅមន្ទីរពេទ្យ ខណៈដែលសមត្ថកិច្ចកំពុងស្វែងរកចាប់ខ្លួនមេជាងម្នាក់មើលការខុសត្រូវលើឡចំហុយនោះ។
អធិការនគរបាលខណ្ឌមានជ័យ លោក តេង ស៊ីណូ បានប្រាប់វីអូឌីកាលពីថ្ងៃម្សិលមិញថា បុរសម្នាក់ ត្រូវបានសម្លាប់ ហើយស្ត្រីម្នាក់រងរបួសបាក់ភ្លៅ ហើយមនុស្ស ៤នាក់ទៀត រងរបួសស្រាល និងត្រូវបានបញ្ជូនទៅសង្គ្រោះនៅមន្ទីរពេ្យ បន្ទាប់ពីការផ្ទុះឡចំហុយអ៊ុតខោអាវមួយ ស្ថិតនៅសង្កាត់ស្ទឹងមានជ័យ នៅព្រឹកថ្ងៃម្សិលមិញនេះ។
ប៉ុន្តែ អធិការរងនគរបាលខណ្ឌមានជ័យ លោក ហួរ ម៉េងវ៉ាង បានប្រាប់វីអូឌីនៅថ្ងៃនេះថា ស្ត្រីជាបុគ្គលិកអនាម័យ ដែលរងរបួសបាក់ភ្លៅនៅក្នុងឧបទ្ទវហេតុនោះ បានស្លាប់ហើយ ក្រោយពីបញ្ជូនទៅសង្គ្រោះនៅមន្ទីរពេទ្យរុស្ស៊ី។
ការស្លាប់របស់ស្ត្រីម្នាក់នោះ បានធ្វើឲ្យអ្នកស្លាប់ក្នុងគ្រោះថ្នាក់នោះ មានចំនួន ២នាក់។
មន្ត្រីដដែលនេះ បានបន្ថែមថា សមត្ថកិច្ចជំនាញបានសន្និដ្ឋានហេតុការណ៍នេះថា អាចបណ្តាលមកពីឡចំហុយអ៊ុតខោអាវនោះស្ងួតទឹកពេក ឬអាចបណ្តាលមកពីខុសបច្ចេកទេសជាដើម ដែលបណ្តាលឲ្យឡនោះផ្ទុះដូច្នេះ។
លោកបញ្ជាក់ថា សមត្ថកិច្ចកំពង់តាមចាប់ខ្លួនជាងម៉ាស៊ីនដែលមើលការខុសត្រូវឡអ៊ុតខោអាវនេះដែលបច្ចុប្បន្នបុគ្គលិករូបនោះបានរត់គេចខ្លួន៕