ក្រុមកម្មករសំណង់ជាច្រើនរយនាក់ បានប្រមូលផ្ដុំគ្នានៅមុខវិមានរដ្ឋសភានៅព្រឹកថ្ងៃអាទិត្យទី៣០មេសានេះ ដើម្បីជាការរំលឹកខួបលើកទី១៣១ឆ្នាំ នៃទិវាពលកម្មអន្តរជាតិ០១ឧសភា ជាមួយការស្នើសុំ៥ចំណុចទៅរដ្ឋសភា ក៏ដូចជារដ្ឋាភិបាលផងដែរ។
អគ្គលេខាធិការសហព័ន្ធសហជីពកម្មករសំណង់ និងព្រៃឈើកម្ពុជា លោក យ៉ាន់ ធី បានប្រាប់វីអូឌីថា កម្មករសំណ់ងចន្លោះពី ២៥០ ទៅ៣០០នាក់ មកពីការដ្ឋានសំណង់នានាក្នុងរាជធានីភ្នំពេញ បានជួបជុំគ្នានៅមុខរដ្ឋសភា មួយថ្ងៃមុនថ្ងៃ០១ឧសភា ដែលជាទិវាពលកម្មអន្តរជាតិ។
លោកបន្ថែមថា សហព័ន្ធសហជីពរបស់លោក បានស្នើទៅរដ្ឋាភិបាលកម្ពុជា ឲ្យកំណត់ប្រាក់ឈ្នួលគោលសម្រាប់កម្មករសំណង់ ការគិតគូរពីបញ្ហាសុខភាព និងសុវត្ថិភាពរបស់កម្មករសំណង់ ការពង្រីកវិសាលភាពនៃបេឡាជាតិរបបសន្តិសុខសង្គមទៅលើក្រុមកម្មករសំណង់ ការត្រួតពិនិត្យទៅលើក្រុមហ៊ុនសាងសង់ និងការស្នើឲ្យកែប្រែច្បាប់ស្ដីពីសហជីពដើម្បីធានានូវសេរីភាពរបស់សហជីពក្នុងការជួយដល់ក្រុមកម្មករសំណង់។
លោក យ៉ាន់ ធី បានបញ្ជាក់ថា ការប្រមូលផ្ដុំនេះ បានដំណើរការទៅក្រោមការឃ្លាំមើលពីកម្លាំងសមត្ថកិច្ច និងអាជ្ញាធរមូលដ្ឋានមួយចំនួនតែប៉ុណ្ណោះ៕