នាយករងវិទ្យុអាស៊ីសេរីផ្នែកភាសាខ្មែរ លោក ហួត វុទ្ធី ឬហៅ លោក ជុន ច័ន្ទបុត្រ មិនចូលបំភ្លឺតាមដីកាកោះរបស់សាលាដំបូងរាជធានីភ្នំពេញនៅថ្ងៃនេះទេ។
សេចក្តីថ្លែងការណ៍កាលពីម្សិលមិញ អាស៊ីសេរីឲ្យដឹងថា លោក ជុន ច័ន្ទបុត្រ មិនវិលត្រឡប់មកប្រទេសកម្ពុជាវិញទេ បន្ទាប់ពីចាកចេញកាលពីចុងសប្តាហ៍កន្លងទៅ។
សេចក្តីថ្លែងការណ៍បន្តថា អាជ្ញាធរបានជ្រើសរើសយកករណីប្រឆាំងរូបលោក មកធ្វើជារឿងនយោបាយ ក្នុងចេតនាបង្វែងការចាប់អារម្មណ៍របស់ប្រជាពលរដ្ឋខ្មែរក្នុងពេលប្រកួតប្រជែងដ៏ស្វិតស្វាញនារដូវកាលបោះឆ្នោត។
សេចក្តីថ្លែងការណ៍ដដែលបញ្ជាក់ពីការបារម្ភចំពោះសុវត្ថិភាព និងគ្មានជំនឿលើការអនុវត្តច្បាប់មកលើ លោក ជុន ច័ន្ទបុត្រ។
សេចក្តីថ្លែងការណ៍បន្តទៀតថា អាស៊ីសេរី មិនចង់ឲ្យលោកស្ថិតក្នុងស្ថានភាពប្រថុយគ្រោះថ្នាក់ និងមិនចង់ឲ្យប៉ះពាល់ដល់លទ្ធភាពក្រុមការងារ។
អាស៊ីសេរី នៅតែប្រកាន់ជំហរថា លោក ហួត វុទ្ធី មិនបានប្រព្រឹត្តបទឧក្រិដ្ឋអ្វីទាំងអស់ និងថាទង្វើរបស់អាជ្ញាធរ បង្ហាញឲ្យឃើញនូវស្ថានភាពដ៏អាក្រក់ នៃសេរីភាពសារព័ត៌មាននៅកម្ពុជា។
លោក ឌុន វិបុល មេធាវីរបស់លោក ជុន ចន្ទ័បុត្រ នៅព្រឹកនេះបានដាក់ឯកសារជូនសាលាដំបូងរាជធានីភ្នំពេញ រួចរាល់ហើយ «ទោះបីជាកូនក្តីខ្ញុំបាទនៅឆ្ងាយក៏ដោយ ប៉ុន្តែដោយសារមធ្យោបាយទាក់ទងបាន ដូច្នេះហើយគាត់ក៏បានផ្ញើរនូវចម្លើយដោះសារពីការចោទប្រកាន់ដែលថាគាត់បន្លំខ្លួនចូលពន្ធនាគារហ្នឹង គឺថាអង្គេហតុខ្ញុំបានដាក់ជូនតុលាករហើយ ហើយតំណាងអយ្យការខ្ញុំក៏បានចូលជួបផ្ទាល់ជាមួយ លោក សៀង សុខ ពន្យល់អំពីហេតុផលដែលខ្ញុំមកដោយមិនមានកូនក្តី»។
បន្ទាប់ពីទទួលឯកសារពីមេធាវី នៅថ្ងៃទី២ ឧសភា ២០១៧ ដដែលនេះ អយ្យការអមសាលាដំបូងរាធានីភ្នំពេញ បានចេញសេចក្តីថ្លែងការណ៍ ដោយថា «ដើម្បីជាវិធានការសំរាប់ធានានិងផ្តល់ប្រយោជន៍ដល់ចំណាត់ការស៊ើបអង្កេតសំណុំរឿងរួមទាំងការសាកសួរចម្លើយទៅលើជនសង្ស័យ ដែលមានចេតនាគេចវេសមិនចូលខ្លួនតាមការកោះហៅ និងមិនគោរពតាមការសន្យារបស់ខ្លួននៅចំពោះមុខអយ្យការនោះ តំណាងអយ្យការសម្រេចចេញដីការឲ្យចូលឲ្យខ្លួនទៅលើឈ្មោះ ហួត ឃីនវុទ្ធី ហៅ ជុន ចន្ទ័បុត្រ ជាជនសង្ស័យដោយអនុវត្តស្របតាមបទបញ្ញត្តិ នៃក្រមនីតិវិធីព្រហ្មទណ្ឌនិងសម្រេចបន្តចំណាត់ការលើសំណុំរឿងនេះ ស្របតាមបទបញ្ញត្តិច្បាប់ជាធរមាន»។
ជាមួយគ្នានេះដែរ ព្រះរាជអាជ្ញារង លោក សៀង សុខ បានចេញដីកាបញ្ជា បង្គាប់ឲ្យកម្លាំងសមត្ថកិច្ចនាំខ្លួន លោក ជុន ច័ន្ទបុត្រ មកបង្ហាញខ្លួននៅ អយ្យការអមសាលាដំបូងរាជធានីភ្នំពេញ រហូតដល់មានសេចក្តីសម្រេចថ្មីស្តីពីដំណើររឿង ផ្តល់សេចក្តីសម្រេចភូតកុហក បន្លំខ្លួនចូលពន្ធនាគារ ប្រព្រឹត្តនៅមណ្ឌលអប់រំកែប្រែទី១ កាលពីថ្ងៃទី១៩ ខែមេសា ឆ្នាំ២០១៧។
របាយការណ៍របស់អ្នករាយការណ៍គ្មានពំ្រដែនស្ដីពី«សន្ទស្សន៍សេរីភាពសារព័ត៌មាន» ចេញផ្សាយកាលពីចុងខែមេសាឆ្នាំ២០១៧ បានចាត់ថ្នាក់សេរីភាពសារព័ត៌មានរបស់កម្ពុជាថា កាន់ តែអាក្រក់ ដោយអង្គការនេះរកឃើញថា កម្ពុជាបានធ្លាក់ចុះ៤ចំណាត់ថ្នាក់ ពីលេខ១២៨នៅឆ្នាំ២០១៦ មកលេខ១៣២នៅឆ្នាំ២០១៧៕
