រោងម៉ាស៊ីនកិនស្រូវសហគមន៍មួយ នៅស្រុកកំពង់ស្វាយ ខេត្តកំពង់ធំ ត្រូវខ្យល់កន្ត្រាក់បោកបក់បំផ្លាញស្ទើតែទាំងស្រុង កាលពីថ្ងៃទី០៣ខែឧសភា ដែលនាំឲ្យសង្វាក់ផលិតកម្មអង្ករត្រូវផ្អាកទាំងស្រុង។
ប្រធានសហគមន៍កសិកម្មសាន់គរមានជ័យ លោក រំ ជើប បានប្រាប់វីអូឌីតាមទូរស័ព្ទនៅថ្ងៃនេះថា ដំបូងរោងម៉ាស៊ីនកិនស្រូវទំហំ២០គុណនឹង៥០ម៉ែត្រ ផលិតពីស័ង្កសីមានតម្លៃជាង៨ម៉ឺនដុល្លារ ដែលស្ថិតនៅក្នុងភូមិក្បិល ឃុំសាន់គរ បានដួលរាបដល់ដី ក្រោយរងការបោកបក់ពីខ្យល់កន្ត្រាក់កាលពីម៉ោង៦កន្លះល្ងាចថ្ងៃទី០៣ខែឧសភា។
លោកបន្ថែមថា ប៉ុន្តែ ឡសម្ងួត និងម៉ាស៊ីនកិនស្រូវតម្លៃ៥០ម៉ឺនដុល្លារ ដែលជាជំនួយរបស់ទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា JICA នោះ បានរងការខូចខាតតិចតួចប៉ុណ្ណោះ។
បើតាមប្រធានសហគមន៍កសិកម្មរូបនេះ រោងម៉ាស៊ីនកិនស្រូវសហគមន៍សាន់គរមានជ័យនេះ ត្រូវបានបើកដាក់ឲ្យដំណើរកាលពីខែកក្កដា ឆ្នាំ២០១៤ និងប្រមូលទិញស្រូវពីប្រជាកសិករនៅក្នុងស្រុកកំពង់ស្វាយ។
លោក រំ ជើប បានឲ្យដឹងទៀតថា ទីភ្នាក់ងារ JICA របស់ជប៉ុន គ្រោងនឹងចុះទៅពិនិត្យមើលទំហំនៃការខូចខាតដោយផ្ទាល់នៅថ្ងៃអង្គារសប្ដាហ៍ក្រោយ ប៉ុន្តែ លោកពុំទាន់ដឹងថា តើទីភ្នាក់ងារ JICA ជប៉ុន នឹងពិចារណាជួយកសាងរោងម៉ាស៊ីននោះឡើងវិញ ឬយ៉ាងណានោះទេ។
អធិការនគរបាលស្រុកកំពង់ស្វាយ លោក ខេន ឈុនគ័រ បានប្រាប់វីអូឌីតាមទូរស័ព្ទនៅថ្ងៃនេះថា ក្រៅពីបំផ្លិចបំផ្លាញរោងម៉ាស៊ីនកិនស្រូវរបស់សហគមន៍ខាងលើ ខ្យល់កន្ត្រាក់ក៏បានបំផ្លាញផ្ទះសម្បែងប្រជាពលរដ្ឋ ១៨៣គ្រួសារ នៅក្នុងឃុំចំនួន ៥ ក្នុងស្រុករបស់លោកផងដែរ៕