ប្អូនស្រីលោកនាយករដ្ឋមន្ត្រី ហ៊ុន សែន គឺអ្នកស្រី ហ៊ុន ស៊ីណាត បានរិះគន់អភិបាលរាជធានីភ្នំពេញ លោក ប៉ា សុជាតិវង្ស ថា បានហែកសន្លឹកឆ្នោតចោល ក្រោយពីលើកឡើងនូវវិធានការនានានាពេលថ្មីៗនេះ។
កាលពីថ្ងៃម្សិលមិញនេះ កាសែតកោះសន្តិភាពបានដកស្រង់សម្ដីលោក ប៉ា សុជាតិវង្ស ចុះផ្សាយថា អភិបាលរាជធានីភ្នំពេញរូបនេះ បានបញ្ជាទៅគ្រប់ម្ចាស់យានដ្ឋានជួសជុលរថយន្តទាំងអស់ ឲ្យផ្លាស់ទៅក្រៅក្រុង ដើម្បីបញ្ចៀសបញ្ហាចរាចរណ៍។ កោះសន្តិភាពបានបញ្ជាក់ថា លោក ប៉ា សុជាតិវង្ស បានលើកបែបនេះ អំឡុងពេលចុះពិនិត្យការដ្ឋានសាងសង់រង្វង់មូលកួរស្រូវ កាលពីថ្ងៃម្សិលមិញនេះ។
ក្រោយពីការចុះផ្សាយបែបនេះ អ្នកស្រី ហ៊ុន ស៊ីណាត បានរៀបរាប់លើហ្វេសប៊ុករបស់អ្នកស្រីថា ចៅហ្វាយក្រុងនិយាយចេញមកហែកសន្លឹកឆ្នោតរហូត ហើយមិនដឹងថ្នាក់លើគិតម៉េចទេ បែបៗនេះ។
ថ្មីៗនេះ លោក ប៉ា សុជាតិវង្ស បានបង្កឲ្យមានប្រតិកម្មពីមហាជនជាបន្តបន្ទាប់ ក្រោយពីលោកបានលើកនូវវិធានការហាមឃាត់ការនាំចូលរថយន្តជជុះ វិធានការលើទូម៉ាស៊ីន ATM ជាដើម៕