បងប្រុសបង្កើតរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន សាន ថ្មីៗនេះ បានស្នើទៅរដ្ឋមន្ត្រីក្រសួងមហាផ្ទៃ លោក ស ខេង ឲ្យជួយទប់ស្កាត់ការប្រើអំណាចរបស់មន្ត្រីនគរបាលជាន់ខ្ពស់មួយរូបនៅក្រសួងមហាផ្ទៃ ដោយចោទថា មន្ត្រីនគរបាលរូបនោះ តែងតែការពារជនល្មើស នៅក្នុងសំណុំរឿងជម្លោះដីធ្លីនៅក្រុងប៉ោយប៉ែត ខេត្តបន្ទាយមានជ័យ។
ក្នុងលិខិតចុះថ្ងៃទី០២ខែឧសភា ដែលផ្ញើទៅលោក ស ខេង លោក ហ៊ុន សាន បានរៀបរាប់ប្រាប់ទៅលោក ស ខេង ថាមន្ត្រីក្រោមបង្គាប់របស់រដ្ឋមន្ត្រីមហាផ្ទៃរូបនេះ បានគំរាមកំហែងលើរូបលោក ក្រុមគ្រួសារ និងសហការី អំឡុងពេលចុះទៅរៀបចំអភិវឌ្ឍន៍លើដីមួយកន្លែង ស្ថិតនៅក្នុងភូមិព្រៃគប់ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
បងប្រុសបង្កើតរបស់លោកនាយករដ្ឋមន្ត្រីរូបនេះ បានចោទប្រធាននាយកដ្ឋានកណ្ដាលនគរបាលយុត្តិធម៌នៃក្រសួងមហាផ្ទៃ លោក ម៉ក់ ជីតូ ថា តែងតែការពារជនល្មើស ដែលលោក ហ៊ុន សាន ថា ពួកគេបានរំលោភយកដីរបស់លោក និងដីកូនប្រុសរបស់លោក។
ក្នុងលិខិតដដែលនោះ ដែលភ្ជាប់ជាមួយនូវក្បាលលិខិត “ក្រសួងសាធារណការ និងដឹកជញ្ជូន” និង “សហគ្រាសសាធារណៈ ភ្នាក់ងារកម្ពុជានាវាចរ កាំសាប” ផងនោះ លោក ហ៊ុន សាន បានស្នើទៅលោក ស ខេង ឲ្យថ្កោលទោស និងចាត់វិធានការ “ម៉ឺងម៉ាត់” ទៅលើលោក ម៉ក់ ជីតូ ដោយបានចោទថា មន្ត្រីនគរបាលជាន់ខ្ពស់រូបនេះ តែងតែប្រើអំណាចកៀបសង្កត់ជិះជាន់អ្នកស្លូតត្រង់ ដើម្បីផលប្រយោជន៍ និងបក្ខពួកខិលខូចមួយក្ដាប់តូច៕