សម្តេចក្រុមព្រះនរោត្តមរណឫទ្ធិ ព្រះប្រធានគណបក្សហ៊្វុនស៊ិនប៉ិច គ្រោងនឹងយាងទៅកាន់ប្រទេសកូរ៉េខាងជើង នៅខែកក្កដា ខាងមុខនេះ ដើម្បីពង្រឹងមិត្តភាពប្រទេសទាំងពីរ និង បន្ថយភាពតានតឹងនៅក្នុងតំបន់ឧបទ្វីបកូរ៉េ។
ថ្លែងនៅមុខព្រះបរមរាជវាំងក្នុងរាជធានីភ្នំពេញ សម្តេចក្រុមព្រះ ក្រៅពីការពង្រឹងមិត្តភាពព្រះអង្គក៏រុញចិន ឲ្យចាត់វិធានការដើម្បីបន្ថយកម្ពៅនយោបាយនៅឧបទ្វីបកូរ៉េផងដែរ។ នេះបើតាមការចុះផ្សាយរបស់Khmer Times កាលពីម្សិលមិញ។
ព្រះអង្គមានបន្ទូលថា ចាំមើលចិនធ្វើកិច្ចការមួយចំនួនមុនព្រះអង្គ ហើយបើចិនបរាជ័យនោះព្រះអង្គនិងចាប់ផ្តើមធ្វើសកម្មភាពក្នុងនាមជាមិត្ត៖ «ប្រសិនជាចិនបរាជ័យក្នុងដោះស្រាយមិនបានផលនោះ បន្ទាប់មកខ្ញុំជាមិត្តស្និទ្ធជាមួយមេដឹកនាំកូរ៉េខាងជើង គឺខ្ញុំនឹងលើកឡើងបញ្ហាខ្លះ ដើម្បីធ្វើឲ្យប្រាកដប្រជាថា សង្គ្រាមនុយក្លេអ៊ែនឹងមិនអាចផ្ទុះឡើងទៅរួចនោះទេ»។
ក្រុមប្រឹក្សាសន្តិសុខអង្គការសហប្រជាជាតិ បានថ្កោលទោសជាថ្មី ចំពោះការសាកល្បងអាវុធនុយក្លេអ៊ែរបស់កូរ៉េខាងជើងម្តងហើយម្តងទៀត ដែលគំរាមកំហែងដល់សន្តិសុខក្នុងតំបន់ និង ពិភពលោក ប៉ុន្តែកូរ៉េខាងជើងបញ្ជាក់ថា ការខំប្រឹងប្រែងអភិវឌ្ឍន៍កម្មវិធីអាវុធនុយក្លេអ៊ែគឺគ្រាន់តែដើម្បីការពារប្រទេសតែប៉ុណ្ណោះ មិនមានបំណងឈ្លានពាន ឬ បង្ករអន្តិសុខនោះទេ។
ភាពតានតឹងនៅឆ្នាំ២០១៧ នេះ គឺកើតឡើងនៅពេលដែលកូរ៉េខាងជើងបន្តបាញ់មីស៊ីលឆ្លងទ្វីប បើទោះបីជាការសាកល្បងមួយចំនួនត្រូវបរាជ័យក៏ដោយ ដែលឈានដល់សហរដ្ឋអាមេរិក បានត្រៀមនាវាចម្បាំងទុកសម្រាប់វាយប្រហារកូរ៉េខាងជើង។
ទោះយ៉ាងណា វិភាគបញ្ហានយោបាយមួយចំនួនមិនសង្ឃឹមថា សម្តេចក្រុមព្រះអាចមានឥទ្ធិពលបន្ថយកម្តៅនយោបាយនៅឧបទ្វីបកូរ៉េបានទេ។