អគ្គស្នងការដ្ឋាននគរបាលជាតិបានចុះផ្សាយថា អាជ្ញាធរពាក់ព័ន្ធក្នុងខេត្តបាត់ដំបង រួមទាំងតុលាការផង រងការចោទថា ទទួលលុយសូកប៉ាន់ ហើយអនុញ្ញាតឲ្យមានការបើកល្បែងភ្នាល់ទឹកភ្លៀង រីករាលដាលនៅក្នុងខេត្ត នាំឲ្យមានការព្រួយបារម្ភពីអំពើចោរកម្ម ឬ ឆក់ប្លន់កើតឡើង។
គេហទំព័រអគ្គស្នងការដ្ឋាននគរបាលជាតិចុះផ្សាយថ្ងៃនេះថា ល្បែងភ្នាល់ទឹកភ្លៀងកំពុងរាលដាលស្ថិតនៅភូមិស្រែ១០០ សង្កាត់ស្រែចារ ក្រុងបាត់ដំបង ខេត្តដំបង និង កំពុងពង្រឹងសាខាភ្នាល់បន្ថែមទៀត នៅតាមផ្សារទូទាំងខេត្តបាត់ដំបង។
ប៉ុន្តែស្នងការនគរបាលខេត្តបាត់ដំបង លោក ស ថេត បានដិសេធការចោទប្រកាន់នេះ ដោយថា លោកមិនបានយកសំណូលនោះឡើយ ហើយកន្លងមក សមត្ថកិច្ចបានចុះបង្ក្រាបជារៀងរាល់ថ្ងៃដែរ។
លោកថា«យើងគិតតែពីបង្ក្រាបមើលនៅភ្នំពេញមើល ប៉ុន្មានសួរមើលនៅភ្នំពេញធ្វើបានស្អាតនៅហើយនៅនេះបង្ក្រាបរហូតបានថាពួកហ្នឹងវាទៅមានភស្តុតាងណាដើម្បីយើងចុះទៅ បើវាលេងតែតាមទូរស័ព្ទអីហ្នឹង ខ្ញុំគ្មានការពាក់ព័ន្ធអីទេ ការចុះដោយគ្មានមូលដ្ឋានចឹង លូវធ្វើសិក្សាស្រាវជ្រាវឡើងវិញបាន។ ខ្ញុំដឹងហើយប៉ុនសិក្សាទៀតមើល សួរថាសមត្ថកិច្ចខិតខំបង្ក្រាបដែលឬអត់ ហើយយើងសំខាន់បុកមកតែខេត្តមួយចុះនៅរាជធានីភ្នំពេញគិតម៉េចយ៉ាងម៉េចដែរ។ យើងខ្ញុំអនុវត្តទៅតាមបទបញ្ជារបស់អគ្គ របស់ក្រសួងរហូតដល់ប្រមុខរដ្ឋាភិបាលពីល្បែងស៊ីសងគ្រប់ប្រភេទមិនមែនតាអាហ្នឹងទេ។ អានេះវាទៅជាទំនៀមទម្លាប់ ហើយទៅលេងណាមានភស្តុតាង ដើម្បីឲ្យយើងទៅចាប់ទៅអីបាន ដូចល្បែងអាប៉ោង ល្បែងអីផ្សេង យើងខ្ញុំខិតខំហើយ សូមពិចារណាឡើងវិញ ឃើញសិក្សាទៅបើថាមានភស្តុតាងយើងធ្វើតាមច្បាប់ទៅ»។
មន្ត្រីសម្របសម្រួលអង្គការលីកាដូប្រចាំខេត្តបាត់ដំបងលោក ហេង សាយហុង មានប្រសាសន៍ថា កន្លងមកធ្លាប់តែលឺប្រជាពលរដ្ឋនិយាយតៗគ្នាពីល្បែងភ្នាល់ទឹកភ្លៀងនេះ ។ លោកបន្តថា ប្រសិនមានបទល្មើសនេះកើតឡើងពិតមែននោះអាជ្ញាធរគួរតែចាត់វិធានការឲ្យបានឆាប់ ដោយថា បើមានបទល្មើសនេះនឹងធ្វើឲ្យពីអំពើចោរកម្ម ឬ ឆក់ប្លន់ កើតឡើង។
ប្រជាពលរដ្ឋមួយចំនួនចោទថា អាជ្ញាធរពាក់ព័ន្ធអាចនឹងទទួលផលប្រយោជន៍ពីអ្នកបើកល្បែងភ្នាល់ទឹកភ្លៀងទាំងនោះ ទើបការបើកភ្នាល់ល្បែងទាំងចំហគ្មានការទប់ស្កាត់ពីអាជ្ញាធរមានសមត្ថកិច្ច។ ប្រជាពលរដ្ឋមានការព្រួយបារម្ភពីបញ្ហាសន្តិសុខដោយសារ ល្បែងទាំងនេះ នាំឲ្យមានហិង្សាក្នុងគ្រួសារ អំពើចោរកម្ម កើតឡើងផ្សេងៗ។
