ស្ថានទូតកម្ពុជាប្រចាំនៅម៉ាឡេស៊ីបានជួយសង្គ្រោះពលករខ្មែរ៨នាក់ បន្ទាប់ពីពួកគេជួបការលំបាកនៅកន្លែងការងារឯបរទេស។
ក្នុងសេចក្ដីប្រកាសព័ត៌មាន ចេញផ្សាយនៅថ្ងៃទី១៦ខែឧសភាឆ្នាំ២០១៧ អ្នកនាំពាក្យក្រសួងការបរទេសកម្ពុជាលោក ជុំ សុន្ទរី បញ្ជាក់ថា ស្ថានទូតកម្ពុជាប្រចាំនៅម៉ាឡេស៊ីបានជួយសង្គ្រោះពលការិនីខ្មែរចំនួន៧នាក់ និងពលករម្នាក់ បញ្ជូនត្រឡប់មកកម្ពុជាវិញ បន្ទាប់ពីពួកគេថា មិនអាចទ្រាំទ្រនឹងការងារនៅទីនោះ។
បើតាមសេចក្ដីប្រកាសព័ត៌មាន ក្នុងចំណោមពលករទាំង៨នាក់ មាន៣នាក់បានមកដល់អាកាសយានដ្ឋានអន្ដរជាតិភ្នំពេញហើយ កាលពីថ្ងៃទី១៣ឧសភា។ ចំណែក៥នាក់ទៀត នឹងមកដល់កម្ពុជានៅល្ងាចថ្ងៃទី១៦ ខែឧសភា ឆ្នាំ២០១៧ នេះ។
របាយការណ៍ក្រសួងឲ្យដឹងថា កាលពីឆ្នាំ២០១៦ ពលករខ្មែរចំណាកស្រុកជាង៨០០នាក់ ត្រូវបានជួយសង្គ្រោះ និងបញ្ជូនត្រឡប់មកមាតុភូមិវិញ ក្នុងនោះ បញ្ជូនមកពីម៉ាឡេស៊ីមាន២៧២នាក់ វៀតណាមមាន២៣១នាក់ ថៃ១៣៩នាក់ និងមកពីឥណ្ឌូណេស៊ីមាន៧៨នាក់ រួមទាំងបណ្ដាប្រទេសផ្សេងទៀត ដូចជា ចិន ជប៉ុន សិង្ហបុរី ហ្វីលីពីន ជាដើម៕
