អភិបាលខណ្ឌឫស្សីកែវ លោក ជា ពិសី កាលពីថ្ងៃម្សិលមិញនេះ បានបង្ហោះសារហួសចិត្តនៅលើទំព័រហ្វេសប៊ុករបស់លោកថា ពលរដ្ឋមួយចំនួន បានធ្វើទង្វើចាក់អង្ករយកអង្កាម ដែលនេះគឺជាសារកើតឡើងក្រោយគណបក្សប្រជាជនកម្ពុជា បានបាត់សំឡេងគាំទ្រភាគច្រើននៅក្នុងខណ្ឌមួយនេះ ទៅខាងគណបក្សសង្គ្រោះជាតិ។
យោងតាមលទ្ធផលបោះឆ្នោតបឋមចេញដោយ គ.ជ.ប. បង្ហាញថា គណបក្សសង្គ្រោះជាតិ បានឈ្នះដាច់នៅតាមសង្កាត់ចំនួន ៥ ខណៈគណបក្សប្រជាជនកម្ពុជា ឈ្នះដាច់នៅតាមសង្កាត់ ២ នៅក្នុងចំណោមសង្កាត់សរុបចំនួន ៧ នៅក្នុងខណ្ឌមួយនេះ។
បន្ទាប់លទ្ធផលនៃការបោះឆ្នោតចេញមកដូច្នេះ លោក ជា ពិសី បានបង្ហោះសារហួសចិត្តលើទំព័រហ្វេសប៊ុករបស់លោកថា លោកហួសចិត្តនឹងប្រជាពលរដ្ឋមួយចំនួន ធ្វើទង្វើចាក់អង្ករយកអង្កាម បោះបង់ចោលអ្នកបម្រើដលមានសមត្ថភាព បម្រើប្រជាពលរដ្ឋដោយសុច្ចចិត្តស្មោះត្រង់ ហើយទៅស្រវាយកអ្នកអសមត្ថភាព និងភូតកុហកទៅវិញ។ លោក ជា ពិសី បានចោទជាសំណួរថា តើយុត្តិធម៌នៅឯណា?
ពលរដ្ឋម្នាក់កញ្ញា កើត សុខារ៉ានី ដែលផ្ទះសម្បែងឪពុកម្ដាយរបស់នាង ត្រូវអាជ្ញាធរខណ្ឌឫស្សីកែវឈូសកម្ទេចចោលកាលពីឆ្នាំ២០១៥កន្លងមក បានប្រតិកម្មទៅនឹងលោក ជា ពិសី ថា បណ្ដើរគ្នាវៃផ្ទះម៉ែឪគាត់ចោល គេហៅម៉េចវិញ?
