អង្គការសង្គមស៊ីវិល សម្ដែងការមិនពេញចិត្តចំពោះការបដិសេធដោយមិនត្រឹមត្រូវ និងបែបរើសអើងចំពោះសិទ្ធិទទួលបានការថែទាំសុខភាពរបស់អ្នកការពារសិទ្ធិមនុស្សអាដហុកដែល ជាប់ឃុំ។
សេចក្តីថ្លែងការណ៍កាលពីម្សិលមិញ របស់បណ្តុំអង្គការជាង៣០ ដែលធ្វើការទាក់ទងនឹងសិទ្ធិមនុស្ស ថ្លែងបារម្ភជាខ្លាំងពីអ្នកជាប់ឃុំ ដែលមានបញ្ហាសុខភាពធ្ងន់ធ្ងរ ជាពិសេសគឺ លោក នី សុខា ដែលបានដួលសន្លប់ក្នុងបន្ទប់ទឹកពន្ធនាគារ។
សេចក្តីថ្លែងការបន្តថា ស្ថានភាពនេះអាចបណ្តាលមកពីការបដិសេធចំពោះក្រុមគ្រូពេទ្យក្នុងការផ្ដល់សេវាពិនិត្យ និងថែទាំសុខភាពឲ្យបានជាប់ជាប្រចាំដល់អ្នកទាំងនោះ ព្រមទាំងស្ថានភាពមិនអំណោយផលនៅពន្ធនាគារ។
បើតាមសេចក្តីថ្លែងការណ៍ សង្គមស៊ីវិលទទូចឲ្យអាជ្ញាធរកម្ពុជា ពិចារណាពីបញ្ហាសុខភាពរបស់ពួកគាត់ដែលកំពុងតែធ្លាក់ចុះខ្សោយជាខ្លាំង និងបញ្ឈប់ការអូសបន្លាយឃុំខ្លួនបណ្ដោះអាសន្នលើពួកគាត់ដោយគ្មានមូលដ្ឋានគ្រប់គ្រាន់ តាមរយៈការបដិសេធសំណើសុំនៅក្រៅឃុំនេះទៀតទៅ។
សង្គមស៊ីវិលឲ្យដឹងថា ក្រុមគ្រូពេទ្យអង្គការលីកាដូបានចូលទៅពិនិត្យ និងព្យាបាលអ្នកការពារសិទ្ធិមនុស្សទាំង៥ ដែលកំពុងជាប់ឃុំក្នុងពន្ធនាគារ ចាប់តាំងពីការឃុំខ្លួនរបស់អ្នកទាំងនោះ រហូតមកទល់ពេលដែលមានការរឹតត្បិតការចូលទៅសួរសុខទុក្ខ ចាប់ពីខែមេសា ឆ្នាំ២០១៧។ ទើបតែសប្ដាហ៍មុននេះទេ ដែលមានការអនុញ្ញាតឲ្យគ្រូពេទ្យលីកាដូបានចូលទៅពិនិត្យ និងព្យាបាលអ្នកទាំងនោះដោយពេញលេញវិញ។
មន្ត្រីការពារសិទ្ធិមនុស្សអង្គការអាដហុក៤រូបគឺ លោក នី សុខា លោក យី សុខសាន្ត លោក ណៃ វ៉ង់ដា និងលោកស្រី លឹម មុនី រួមទាំងមន្ដ្រី គ.ជ.ប ម្នាក់ទៀត លោក នី ចរិយា ត្រូវបានអង្គភាពប្រឆាំងអំពើពុករលួយចាប់ខ្លួនកាលពីចុងខែមេសាឆ្នាំ២០១៦ ខណៈស្ថានការណ៍នយោបាយកំពុងឡើងកម្តៅ។
អ្នកទាំង៥រូបនោះ ត្រូវបានឃុំបណ្តោះអាសន្នជាងមួយឆ្នាំហើយ ដោយចោទប្រកាន់ពីបទសូកប៉ាន់សាក្សី និងសមគំនិតសូកប៉ាន់សាក្សីពាក់ព័ន្ធនឹងសំណុំរឿងនាង ខុម ចាន់តារាទី ហៅ “ស្រីមុំ” ប៉ុន្តែតុលាការថា មិនទាន់មានភស្តុតាងគ្រប់គ្រាន់ដើម្បីកាត់ទោស៕
