ប្រធានគណបក្សសម្ព័ន្ធដើម្បីប្រជាធិបតេយ្យប្រកាសធ្វើយុទ្ធនាការទ្រង់ទ្រាយធំ ប្រមូលឈ្មោះអ្នកដែលរិះគន់លោក ដើម្បីដាក់ពាក្យប្តឹងទៅតុលាការ ដោយចោទថាអ្នកទាំងអស់នោះកំពុងតែធ្វើឲ្យខូចបរិយាកាសនៅក្នុងសង្គម។
នៅលើហ្វេសប៊ុករបស់លោក ខឹម វាសនា ប៉ុន្មានថ្ងៃនេះ បានឆ្លើយតបជាមួយអ្នកប្រើប្រាស់បណ្តាញសង្គមហ្វេសប៊ុកជាច្រើន ដែលបានរិះគន់លោក ពិសេសអ្នកចោទថា លោកជាអ្នកលើកដៃឯកភាពឲ្យកាត់កោះត្រល់ឲ្យវៀតណាម ឬគាំទ្រសន្ធិសញ្ញាបំពេញបន្ថែមឆ្នាំ២០០៥ ពេលលោក ខឹម វាសនា នៅជាតំណាងរាស្ត្រគណបក្ស សម រង្ស៊ី។
លោក ខឹម វាសនា បញ្ជាក់ថា បើអ្នកប្រើប្រាស់ហ្វេសប៊ុកទាំងនោះ និយាយប៉ះពាល់កេរ្តិ៍ឈ្មោះលោកនោះ គឺលោកមិនប្តឹងទេ ប៉ុន្តែលោកថា អ្នកទាំងនោះធ្វើឲ្យខូចបរិយាកាសសង្គម ធ្វើឲ្យអ្នកស្លូតត្រង់គិតខុស។ លោកសរសេរថា៖ «សូមពួកយើង LDP ជួយប្រមូលអាស័យដ្ឋានពិតប្រាកដ ក្មួយៗអ្នកស្នេហាជាតិប៉ុន្មាននាក់នេះអោយស្នាក់ការកណ្តាល LDP ផង។ យើងនឹងបើកយុទ្ធនាការទ្រង់ទ្រាយធំប្រឆាំងនឹងពួកកូរសង្គមខ្មែរ អោយមនុស្សខ្មែរស្លូតត្រង់គាត់វង្វេង។ យកពួកគេទៅតុលាការអោយអស់ កុំអោយពួកគេបំពុលសង្គមខ្មែរបាន។ សុំទោសណាពួកក្មួយៗ មកពីក្មួយបង្ខំពូអោយធ្វើ ឥឡូវពូសំរេចថាបំពេញតាមបំណងពួកក្មួយហើយ៕»
ទោះយ៉ាងណារហូតដល់ថ្ងៃចន្ទនេះ លោក ខឹម វាសនា មិនទាន់បានបញ្ជាក់ថា មនុស្សប៉ុន្មាននាក់ ដែលលោកត្រូវប្តឹង ហើយត្រូវប្តឹងនៅថ្ងៃណានៅឡើយ។
កាលពីចុងខែមិថុនាកន្លងទៅ មានពលរដ្ឋម្នាក់នៅក្នុងរាជធានីភ្នំពេញ បានចេញមុខដាក់ពាក្យប្តឹងលោក ខឹម វាសនា ដោយថាមេបក្សរូបនោះ បានជេរប្រមាថនិងមើលងាយពូជសាសន៍ខ្មែរ ហើយប្រើពាក្យអសុរសជាច្រើន ប៉ះពាល់ដល់កិត្តិយស សេចក្ដីថ្លៃថ្នូររបស់ប្រទេសជាតិ៕
សេចក្តីកែតម្រូវ៖ នៅថ្ងៃទី៧ខែកក្កដាឆ្នាំ២០១៧នេះ វីអូឌី សុំធ្វើការកែតម្រូវព័ត៌មាន ដែលបានផ្សាយពីថ្ងៃ៣ខែកក្កដាឆ្នាំ២០១៧ ដែលមានចំណងជើងថា «លោក ខឹម វាសនា បើកយុទ្ធនាការទ្រង់ទ្រាយធំប្តឹងអ្នករិះគន់» ដោយកែទៅជា «លោក ខឹម វាសនា បើកយុទ្ធនាការទ្រង់ទ្រាយធំប្តឹងអ្នកដែលលោកចោទថាពួកកូរសង្គមខ្មែរ» និងឃ្លានៃកឋាខណ្ឌទី១ ត្រង់ចំណុច «ប្រមូលឈ្មោះអ្នកដែលរិះគន់លោក» ដោយកែទៅជា «ប្រមូលឈ្មោះអ្នកដែលលោកចោទថាពួកកូរសង្គមខ្មែរ» វិញ។
