មន្ត្រីជាន់ខ្ពស់ របស់គណបក្សកាន់អំណាច បានអះអាងជាចំហថា ច្បាប់គណបក្សនយោបាយថ្មី ដែលនឹងទៅដល់ដៃរដ្ឋសភា ដើម្បីសុំធ្វើវិសោធនកម្មជាលើកទី២នោះ លោកថានឹងបញ្ចប់ជីវិតនយោបាយទាំងស្រុង របស់អតីតមេដឹកនាំបក្សប្រឆាំង លោក សម រង្ស៊ី។
តំណាងរាស្ត្រមួយរូបនិងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រាប់អ្នកសារព័ត៌មាន នៅមន្ទីររដ្ឋសភាថា នៅថ្ងៃទី៣ខែកក្កដានេះ តំណាងរាស្ត្ររបស់គណបក្សប្រជាជនជាង៣០រូប បានចុះហត្ថលេខារួមគ្នារួចហើយ ដើម្បីបើកផ្លូវឲ្យរដ្ឋសភាអាចអនុម័តលើការស្នើសុំធ្វើវិសោធនកម្មច្បាប់គណបក្សនយោបាយជាលើទី២។
លោក សុខ ឥសាន ឲ្យដឹងទៀតថា ខ្លឹមសារច្បាប់ដែលគ្រោងដាក់ឲ្យរដ្ឋសភាពិភាក្សានិងអនុម័ត្រនៅពេលឆាប់ៗខាងមុខនេះ លោកថានឹងបិទច្រកលោក សម រង្ស៊ី មិនឲ្យធ្វើសកម្មភាពនយោបាយបានដូចកាលពីជាង២០ឆ្នាំមុន។
លោកថា៖ «យើងឃើញហើយថា ក្នុងរយៈពេលជាង២០ឆ្នាំ ដែលគាត់[ សម រង្ស៊ី ]ធ្វើសកម្មភាពនយោបាយ ថាតើគាត់បានបង្កើតអ្វីខ្លះសម្រាប់ប្រទេសជាតិនិងប្រជាជន? គាត់មិនចង់ឲ្យប្រទេសជាតិនិងប្រជាជនមានសេចក្តីសុខទេ អញ្ចឹងទេច្បាប់ហ្នឹងធ្វើ គឺដើម្បីគោលបំណងហ្នឹងហើយ គ្មានអីក្រៅពីហ្នឹងទេ។ ឥឡូវគាត់កំចាត់ជីវិតនយោបាយដោយខ្លួនឯងរួចហើយ អញ្ចឹងទេនៅជីវិតសង្គមមួយទៀត ហើយបញ្ហានេះមិនមែនជាការរំលោភរដ្ឋធម្មនុញ្ញដូច ដែលកាសែតមួយចំនួនសរសេរនោះទេ»។
កាលថ្ងៃទី២៨ខែមិថុនា លោកនាយករដ្ឋមន្ត្រី ហ៊ុន សែន បានជំរុញម្តងទៀតឲ្យតំណាងរាស្ត្ររបស់ខ្លួន ដែលមានសំឡេងភាគច្រើនក្នុងសភា ធ្វើវិសោធនកម្ម ច្បាប់គណបក្សនយោបាយឡើងវិញ បន្ទាប់ពីតំណាងរាស្ត្ររបស់លោកបានធ្វើវិសោធនកម្ម ក្រោមសំឡេងរិះគន់ម្តងហើយកាលពីលើកមុន។
ការបញ្ជារជាថ្មីទៀតរបស់លោក ហ៊ុន សែន នេះបានធ្វើឡើង តែប៉ុន្មានថ្ងៃក្រោយពីអតីតមេដឹកនាំបក្សប្រឆាំង ដែលកំពុងនីរទេសខ្លួន លោក សម រង្ស៊ី បន្តនិយាយថា គណបក្សប្រជាជនកម្ពុជា មានដើមកំណើត ចេញពីប្រភពបក្សកុម្មុយនីស្តវៀតណាម។
ប៉ុន្តែលោក សម រង្ស៊ី បានចាត់ទុកថា ការដែលគបក្សប្រជាជនកម្ពុជា កែច្បាប់ដដែលនេះជាថ្មីទៀត លោកថា ជាការខ្លាចស្រមោលលោកនិងថាបក្សកាន់អំណាចកំពុងបិទបាំងអំពើអាក្រក់របស់ខ្លួន។
លោក សម រង្ស៊ី សរសេរនៅលើហ្វេសប៊ុកផ្លូវការ របស់លោកនៅថ្ងៃទី២ខែកក្កដាថា៖ “អ្នកដឹកនាំប្រទេសសព្វថ្ងៃ មិនចាំបាច់កែច្បាប់ចុះឡើង ហើយមិនចាំបាច់ខ្លាចរូបខ្ញុំ ឈ្មោះខ្ញុំ សម្លេងខ្ញុំ និងស្រមោលខ្ញុំ ដល់ថ្នាក់ហ្នឹងទេ បើពួកខ្លួនមិនធ្វើអំពើអាក្រក់“។
អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី លើកឡើងថា ការព្យាយាមធ្វើច្បាប់បែបនេះ អាចជាយុទ្ធសាស្ត្រយកប្រៀបលើដៃគូប្រកួត ដូចដែលគណបក្សនេះធ្លាប់យកប្រៀបលើគណបក្សហ្វ៊ុនស៊ិនប៉ិច ដោយធ្វើច្បាប់ឯកព័ន្ធភាព ប្រឆាំងនឹងសម្តេចក្រុមព្រះ។
ប៉ុន្តែលោក មាស នី ថាល្បែងនយោបាយ ដែលមេដឹកនាំទាំងពីរ កំពុងលេងនេះ លោកថាមិនបានផ្តល់ប្រយោជន៍ ដល់ប្រទេសជាតិ។
លោកថា៖ «បើប្រយោជន៍ជាតិក៏គ្មានបានទេ ហើយបើប្រយោជន៍គណបក្សដើម្បីឲ្យមានប្រជាប្រិយភាពអីក៏គ្មានបានទេ អត់មាននរណាបានផលអីពីហ្នឹងទេ គ្រាន់តែបានផល ឲ្យគូបដិបក្ខហ្នឹងមិនអាចធ្វើដំណើរទៅបានស្រួល ហ្អាស បើជើងវិញធ្វើម៉េចឲ្យពិការជើងមួយចំហៀងកុំឲ្យដើរទៅមុខលឿនពេក»។
លោក សម រង្ស៊ី បានប្រកាសលាលែង ពីប្រធានគណបក្សសង្គ្រោះជាតិ នៅចុងឆ្នាំ២០១៦ នៅពេលដែលលោក ហ៊ុន សែន បញ្ជាឲ្យតំណាងរាស្ត្រ របស់លោកធ្វើវិសោធនកម្មច្បាប់ស្តីពីគណបក្សនយោបាយ ដោយលោក សម រង្ស៊ី ថា លោក ហ៊ុន សែន នឹងប្រើតុលាការ ទៅរំលាយ គណបក្ស របស់លោក ចោលនៅមុនបោះឆ្នោត បើលោកមិនដកខ្លួនចេញ។
ប៉ុន្តែក្រោយមកលោក សម រង្ស៊ី បានបង្ហើមវិញថា លោកនឹងចូលមកកម្ពុជាវិញ ដើម្បីប្រកួតប្រជែងការបោះឆ្នោតជាតិឆ្នាំ២០១៨ ដើម្បីដណ្តើមតំណែងជានាយករដ្ឋមន្ត្រី៕
