ប្រទេសជប៉ុនបានផ្តល់ជំនួយឥតសំណងជិត៦លានដុល្លារដល់កម្ពុជាក្នុងការអភិវឌ្ឍធនធានមនុស្សរយៈពេល៣ឆ្នាំខាងមុខ។
ក្នុងសេចក្តីជូនដំណឹងចុះថ្ងៃទី៣ កក្កដា ឆ្នាំ២០១៧ ក្រសួងការបរទេសបានឲ្យដឹងថា ប្រទេសជប៉ុនបានសម្រេចផ្តល់ជំនួយឥតសំណងដែលមានទឹកប្រាក់ចំនួន៦៤៩លានយ៉េន ដែលស្នើប្រហែល៥,៧៧លានដុល្លា សម្រាប់អនុវត្តន៍គម្រោងអាហាររូបករណ៍អភិវឌ្ឍធនធានមនុស្សពីឆ្នាំ២០១៨ដល់ឆ្នាំ២០២១។
រដ្ឋមន្ត្រីក្រសួងការបរទេសលោក ប្រាក់ សុខុន បានឲ្យដឹងក្នុងពិធីប្តូរសារនៅព្រឹកនេះថា ការផ្តល់ហិរញ្ញប្បទានឥតសំណងរបស់ជប៉ុន សម្រាប់អភិវឌ្ឍធនធានមនុស្សនៅកម្ពុជា មានរយៈពេល១៧ឆ្នាំ មកហើយ។
គិតត្រឹមឆ្នាំ២០១៦ ជប៉ុនបានផ្តល់ជំនួយនេះសរុបចំនួន៥ ២០៨ លានយ៉េន ប្រហែល៤៦លានដុល្លាអាមេរិក សម្រាប់និស្សិតកម្ពុជាចំនួន ៣៦៨នាក់ ទៅបន្តការសិក្សានៅប្រទេសជប៉ុន។ ក្នុងចំណោមនិស្សិត ទាំងនេះមាន ចំនួន២៧៥នាក់ ដែលបានបញ្ចប់ការសិក្សា និងបានវិលមកកាន់ប្រទេសកំណើតវិញ៕
