អ្នកតវ៉ាប្រឆាំងពួករបបមូលធននិយម នៅពេលមេដឹកនាំ G20 បើកការប្រជុំពីរថ្ងៃនៅក្នុងប្រទេសអាល្លឺម៉ង់ ហើយជាលើកទី១នៃការចូលរួមរបស់ប្រធានាធិបតីអាមេរិកនោះ មានផ្ទុះហិង្សាកើតឡើងកាលពីយប់ថ្ងៃព្រហស្បតិ៍ម្សិលមិញ។
កិច្ចប្រជុំនេះប្រព្រឹត្តទៅទីក្រុង Hamburg ជាក្រុងលំធំដាប់ទី២របស់អាល្លឺម៉ង់ មានការជួបគ្នានៅថ្ងៃសុក្រនេះរវាងមេដឹកនាំអាមេរិក លោក ដូណល ត្រាំ មេដឹកនាំរុស្ស៊ី លោក វ្លាឌីមៀ ពូទីន និងលោក ស៊ី ជីនពីង មេដឹកនាំចិន។
តាមទីភ្នាក់ងារព័ត៌មានAFPគឺការប៉ះទង្គិចគ្នាកាលពីម្សិលមិញ អ្នកតវ៉ាបានចោលដបទឹក និង ដុំថ្មលើសមត្ថកិច្ច ចំណែកសមត្ថកិច្ចបានប្រើប្រាស់ ឧស្ម័នបង្ហូរទឹកភ្នែក និងបាញ់ទឹកបំបែកការប្រមូលផ្តុំ។
ក្រោយការប៉ះទង្គិចគ្នាអាជ្ញាធរអះអាងថា នគរបាល៧៦នាក់រងរបួស។ នគរបាលបានថ្លែងតាមឧបករណ៍បំពងសំឡេងថា សមត្ថកិច្ចនឹងមិនមានចំណាត់ការផ្លូវច្បាប់អីទេ បើសិនជាអ្នកតវ៉ាទាំងនោះព្រមបោះបង់ការតវ៉ា ហើយរំសាយក្រុមនោះ។
ទោះយ៉ាងណារបាយការណ៍ដែលទីភ្នាក់ងារព័ត៌មាន AFP ចុះផ្សាយថា ចំនួនអ្នកតវ៉ានៅព្រឹកថ្ងៃសុក្រនេះកើនឡើងច្រើនជាងមុនរហូតដល់១សែននាក់៕
