រដ្ឋាភិបាលកម្ពុជាបានឲ្យដឹងថា រដ្ឋាភិបាលថៃបានសម្រេចផ្អាកការបណ្តេញពលករខ្មែរចេញពីប្រទេសខ្លួន ដោយទុកពេល១៥ថ្ងៃឲ្យពលករខ្មែរ ទៅចុះឈ្មោះបំពេញឯកសារចូលក្នុងបញ្ជីពលករបរទេសរបស់ប្រទេសថៃ។
ក្នុងសេចក្តីប្រកាសព័ត៌មានចុះថ្ងៃទី៧កក្កដានេះ ក្រសួងការងារ បានឲ្យដឹងថា ដើម្បីជៀសវាងនូវការបណ្តេញចេញពីប្រទេស ក្រសួងការងារថៃ បានទុកពេលចំនួន១៥ថ្ងៃ ចាប់ពីថ្ងៃទី២៤កក្កដា ដល់ថ្ងៃទី៧ សីហា ដល់ពលករខ្មែរ និងនិយោជកថៃ ដែលមិនមានឯកសារអ្វីទាំងអស់ ឲ្យទៅចុះឈ្មោះនៅតាមការិយាល័យចុះបញ្ជីពលករបរទេស ដែលបើក១០កន្លែងនៅទីក្រុងបាងកក និង១កន្លែងនៅតាមខេត្តនីមួយៗនៃប្រទេស។
បើតាមសេចក្តីប្រកាសដដែល ក្រសួងការងារកម្ពុជា នឹងសហការជាមួយក្រសួងការងារថៃ ធ្វើបច្ចុប្បន្នភាពពលករខ្មែរដែលទៅរស់នៅ និងធ្វើការនៅប្រទេសថៃទាំងអស់ ចាប់ពីថ្ងៃទី១ ខែសីហា ឆ្នាំ២០១៧ខាងមុខ ដើម្បីឲ្យពលករទាំងនោះក្លាយជាពលករស្របច្បាប់ផងដែរ។
ក្រសួងការងារកម្ពុជា ក៏បានស្នើឲ្យសាធារណជន ជាពិសេសពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃឲ្យរក្សាភាពហ្នឹងហ្នរ និងបំពេញការងារជាប្រក្រតី ជាមួយនិយោជកខ្លួន ដោយថានាពេលខាងមុខ គណៈកម្មការផ្តល់ភាពស្របច្បាប់កម្ពុជា នឹងចុះទៅប្រទេសថៃ ដើម្បីរៀបចំកិច្ចការទាំងនេះហើយ។
បើតាមរបាយការណ៍របស់ក្រសួងការងារឆ្នាំ២០១៦ ពលករចំណាកស្រុកកម្ពុជា ដែលទៅធ្វើការនៅប្រទេសថៃ មានចំនួនជាង១លាននាក់៕
