នាយករដ្ឋមន្ដ្រីវៀតណាមបានបញ្ចេញប្រតិកម្មខ្លាំងៗថា ពួកភេរវករត្រូវតែដាក់ទណ្ឌកម្មឲ្យធ្ងន់ធ្ងរជាទីបំផុត។ ការព្រមាននេះ គឺបន្ទាប់ពីជនជាតិវៀតណាម២នាក់ ត្រូវបានក្រុមបះបោរសម្លាប់ក្នុងប្រទេសហ្វីលីពីន។
បើតាមសារព័ត៌មានវៀតណាម Vietnam News ឲ្យដឹងថា កាលពីថ្ងៃព្រហស្បតិ៍ម្សិលមិញ នាយករដ្ឋមន្ដ្រីវៀតណាមលោក Nguyen Xuan Phuc ថ្លែងថា ក្រុមភេរវករដែលសម្លាប់ពលរដ្ឋវៀតណាម២នាក់ កាលពីថ្ងៃអង្គារដើមសប្ដាហ៍នេះ ត្រូវតែដាក់ទោសឲ្យធ្ងន់ធ្ងរបំផុត។
សារព័ត៌មានវៀតណាម Vietnam News បានដកស្រង់សម្ដីលោកនាយរដ្ឋមន្ដ្រីវៀតណាម ចុះផ្សាយថាថា៖ «ខ្ញុំមានទុក្ខក្រៀមក្រំ និងខឹងយ៉ាងខ្លាំង ពេលឮថា ពលរដ្ឋវៀតណាម២នាក់ ត្រូវបានគេចាប់ជំរិត និងសម្លាប់យ៉ាងអមនុស្សធម៌។ ពួកភេរវករ ដែលបានបណ្ដាលឲ្យពលរដ្ឋវៀតណាមស្លាប់ គឺត្រូវតែដាក់ទោសឲ្យបានធ្ងន់ធ្ងរ។ ខ្ញុំក៏សូមចូលរួមរំលែកទុក្ខដល់គ្រួសារ និងញាតិមិត្តនៃជនរងគ្រោះផង»។
កាលពីដើមសប្ដាហ៍នេះដែរ មន្ដ្រីនាំពាក្យយោធាហ្វីលីពីនលោក ចូ អាន ប៉េទីងឡាយ ឲ្យដឹងថា កងទ័ពហ្វីលីពីនបានរកឃើញសាកសពចំណាប់ខ្មាំង២នាក់ ជានាវិកជនជាតិវៀតណាម នៅឯកោះបាស៊ីឡាន ដែលជាមូលដ្ឋានដ៏រឹងមាំរបស់ក្រុមចាប់ជំរិតមនុស្ស អាប៊ូសាយយ៉ាហ្វ។
ករណីនេះ នាយករដ្ឋមន្ដ្រីវៀតណាមក៏ស្នើឲ្យសហគមអន្ដរជាតិរួបរួមគ្នា ដើម្បីទប់ទល់នឹងក្រុមភេរវកម្ម ដោយថា ដើម្បីសុខសន្ដិភាព ស្ថិរភាព និងការអភិវឌ្ឍទាំងមូលលើពិភពលោក៕
